2020年快將過去,對好多朋友嚟講,今年因為疫情關係,好似一切都停頓咗,冇做過啲乜就已經過咗去。但係有一樣嘢係冇停止嘅,就係政權對香港人持續嘅打壓同拘捕,繼續以法律作為解決政治問題的工具。

作為協助手足嘅律師,好多時都會受到同路人嘅支持鼓勵。處理一個案件,短則幾個月,長則幾年,漫長嘅司法程序當中,唔係淨係得律師同大律師去做,各個環節都有賴好多其他範疇嘅人幫忙,先可以幫到手足。

有日半夜離開警署搭黃的,司機好心遞上一份小禮物,係佢祝福大家可以喺戰場上有一個快樂聖誕。臨近聖誕,好多手足面對不同嘅問題,未必可以快樂。筆者惟有盡能力發放吓正能量,希望用呢度小小嘅篇幅,向其他支援嘅團隊致意。佢哋都值得大家嘅嘉許。

感激現場幫手記住佢哋嘅街坊,幫佢哋尋求支援,令佢哋嘅權利安全得到保障。

感激車手,要去幾遠搵佢哋都送,亦會幫手送埋佢哋返屋企。

感激通宵喺閘門外守候,幫忙協調,照顧佢哋親友嘅議員同議辦職員。

感激送飲品送食物送枱凳送遮去閘外畀各單位用嘅街坊。

感激提供醫療服務畀佢哋嘅牙醫、醫生、物理治療師、心理專家。

感激協助佢哋處理家庭事務同照顧佢哋生活所需,尤其是細路仔,嘅社工。

感激有教無類,唔會放棄佢哋,亦令佢哋唔會放棄自己嘅師長。

感激各位化學、機電、物理、醫學等範疇嘅專家,幫淨係識得睇Law嘅我哋補習。

感激記者,將法庭上所揭露嘅不公之事報道畀公眾知道。

感激直播師同旁聽師,除咗現場支持佢哋,你哋嘅notes,係好pro好有用。

感激傘兵、送車師、探訪師、寫信師,你哋令佢哋多一份鼓勵,少一分孤單。

感激請佢哋繼續工作嘅黃店,令佢哋可以有尊嚴咁維持生活。

好似年底頒獎禮拎獎咁,肯肯定會漏咗點名其他出心出力嘅人,但係大家無私付出,一定唔會介意嘅。

感激打不死嘅香港人,繼續各有各做。聖誕,燃起世人對美好世界嘅希望。

有大家嘅堅持,香港仲有希望。

以上內容為作者個人意見

弟@法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

(原文載於 2020 年 12 月 19 日《蘋果日報》)