俗語有云香港no IT,好不幸地其實法律行業都啱用。點解會咁講?最近疫情肆虐,雖然話就話係放緩咗啲,但係嚟緊冬天將至,始終都有危機會反彈,所以好多律師樓都會實施在家工作嘅安排。法庭都可能會暫停辦公(不過啱啱疫情第三波反彈嘅時候佢又冇…)。

在家工作呢個安排係為咗減低社交接觸,同時又可以盡量做到嘢。但係其實法律行業要實施在家工作係有相當嘅難度。首先法律界係一個對人嘅行業,就算可以打電話、發電郵或者視像會議,有時人都係想親自見面,溝通上會清晰啲。

但係同樣重要嘅問題就係好多律師樓都欠缺投資喺資訊科技之上。好多文件仍然需要用紙本文件,溝通上堅持寄信或者傳真,可能係因為習慣或者人哋要求,延伸一睇其實就會發現係成個生態系統都係咁樣,缺乏喺科技上嘅投資。簡單嘅例子就係用自己屋企電腦係冇辦法入到公司內部嘅伺服器。筆者嘅舊公司入面,佢哋放咗工但係又想發電郵,發咗諗住聽日返到公司檢查,點知係搵唔到個電郵㗎!之後先發現係制式唔相容。

啱先講到生態問題,其實法庭嘅科技嘅落後先係其中最大嘅問題,因為係會好影響律師點樣預備啲文件同埋同法庭溝通。香港法庭直到而家都係唔能夠以電子方式向法庭提交文件,但係英美等國家早已經使用當中;當英國差唔多所有嘅民事訴訟嘅審訊都係以視像會議進行(重要係可以用skype或者zoom等等嘅軟件),香港法庭而家只有一個科技法庭,仲需要額外畀錢。

其實,終審法院首席法官馬道立係今年三月尾嘅時候講到,「司法機構正積極考慮以使用不同的科技,例如電話、視像會議或同類視像設備來聽取陳詞,並擴大法庭聆訊範圍(即不限於緊急或必要的事宜)」。立法會亦都審議緊《法院程序(電子科技)條例草案》,容許包括以電子方式將文件存檔或送交至法院或者畀另一方。

當然,喺善用科技而令到程序更加有效率之外,亦都要確保夠安全,始終法律文件嚟講,保密係非常重要嘅。除此之外亦都要符合法律嘅原則,例如點樣確定真確性,點樣配合到法院嘅規則同程序,呢啲都係馬道立法官早前講到嘅要點。

唯有希望各方考慮周詳之後,法律界人士能夠更加善用科技,令溝通同埋工作上可以快捷啲、方便啲同埋環保啲。最好個肺炎快啲完,咁就一天都光晒啦!

以上內容為作者個人意見

Blue bird@法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸gossip呢行嘅八卦趣事。

(原文載於 2020 年 8月 29 日《蘋果日報》)