疫情肆虐,大家都多咗留喺屋企,仲越嚟越多人嘗試煮嘢食,而原來唔少人都好有煮食天份喎。我就三不五時都喺IG見到好多靚嘢食嘅相,叉燒蛋糕燉蛋各式各樣都有,真係睇到都覺得肚餓。唔怪得好多人都話,過咗今年,有好多人都會破關開通新職業——廚師啦。

咁每樣嘢都一定有人擅長,又有人唔擅長嘅。好似煮嘢食咁,有人煮得好,就一定有煮得……無咁好啦。前排喺大家unlike Daydayxxxx(唔打全名喇,反正早幾日改埋名)嘅風潮當中,有人就開咗一個叫日日爆嘅Facebook page,專門收集大家煮食失敗嘅成品,結果page如其名,真係日日都好爆:有啲食材,好似湯圓同埋青豆蓉咁,其實如果投稿者唔講呢,真係無人睇得出係乜嘢嚟……

嗱嗱嗱,呢度做個利申先,我其實唔知個page邊個開,亦都無投過稿㗎!不過多得有呢個page,每日我都多咗啲笑吓輕鬆吓嘅機會,而且喺笑嘅同時亦都慶幸自己無機會嘗試部份黑暗料理……(sorry呀各位投稿人士!我將快樂建築咗喺你哋嘅痛苦身上!)不過笑還笑啦,其實page上面絕大部份嘢食嘅樣雖然爆啲,但都係食得落肚嘅。據聞各位投稿人士都有一顆珍惜食物嘅心,會搵方法食晒佢哋㗎。

而且據我所見,幾乎所有好爆嘅相都係室內拍攝,咁即係大家至少嗰一餐,都係有瓦遮頭咁樣食啦。原來喺而家嘅香港嚟講,咁樣已經好好㗎喇。點解呢?因為最近政府話禁就禁堂食吖嘛,所以平時因為各種原因要喺餐廳食飯嘅藍領白領打工仔呢,就惟有喺烈日或者落雨濕濕之下當街當巷搵位食飯了。結果短短時間內已經有唔少相流傳,相中嘅升斗市民就喺路邊石壆、樓梯或者車尾廂度,坐喺度甚至跪喺度食飯。

香港人就好互助互愛嘅,有唔少小店同機構即刻決定開放地方畀人食飯。然後政府一下子禁完堂食,先驚覺原來唔係個個有office返或者可以去郊野公園(無呃你,真係有官員咁提議呀)食飯㗎喎,於是就拿拿聲話會開放社區中心畀人食外賣,再到我寫緊篇文時,又話會恢復返早午市堂食喇。

話禁就禁,話畀就畀,呢場牽涉廣大市民嘅鬧劇就令我覺得,其實小市民自己煮食失敗又有幾大不了吖。有個咁唔體恤民情嘅政府去處理民生問題,可以令大家拎住盒飯都唔知去邊度食嘅,呢啲呢,就真係不幸中之不幸喇。

藍天柳@法政巴絲

以上內容為作者個人意見

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸gossip呢行嘅八卦趣事。

原文載於 2020 年 8月 3 日《蘋果日報