別人想像中的女律師,可能在法庭上雄辯滔滔,平日都得勢不饒人,但其實工作以外,女律師都係平常女子,會對愛情有幻想、會追《愛的迫降》、會J古天樂、都可以善解人意。

飲迪士尼奶大的我,小時候曾夢想在樂園搞婚禮,無南瓜車都有堡壘有煙花有白馬王子。長大後,反而極反感公主要王子拯救、女人唔結婚人生唔完整,但係仍然憧憬愛情。

成為律師後,不知是自己性格剛烈定樣衰過在London仆到「甩骹」位仁姐、或者工作時間長、還是男生以為個個女律師都好似恨做SJ恨到流口水又彈得一手好鋼琴嘅女SC(資深大律師)咁高高在上又好勇鬥狠所以驚咗。總之就好似法官覺得差佬打AP(被捕人士)唔關佢事咁,我覺得愛情根本唔關我事。

就在我差點放棄的時候,忠(於感覺)誠(實面對)勇(於挑戰)毅(然追求)的他突然出現了,緣份往往出人意表。然後去年反送中運動期間,我們訂婚了。朋友們都替我們高興,說是久違的好消息,很期待出席我們的婚禮。雖然隱隱擔心有可能受示威影響,但亂世中找到對的人就有如中咗六合彩,我們很快已訂好教堂和酒席場地。

然後誰又會想到,武漢肺炎在悄悄蔓延,但政權愛面子,農曆新年要喜慶,醫護講真話的就要被滅聲。民眾被矇在鼓裏,病毒隨春運散播全國以至全世界。疫情爆發,當權者封鎖消息,堆砌假數字,大話連篇,結果抗疫工作事倍功半,其他地區痛失防疫最佳時機。

然後國際航班取消了,死都不肯封關的無能特首又無科學根據地限制婚禮出席人數了,我夢想可以同好多親友慶祝的婚禮就咁被破壞了。買好機票的外國親友不能回港,連衫都買好的兄弟姊妹團都不能出席婚禮,婚宴改期未定,訂好的蜜月旅行勢將取消。

當然相比無數醫護和清潔工人要冒着生命危險上班、全球數萬民眾失去生命、更多人失去工作和收入、公開考試遙遙無期等等,我的損失不值一提,但已安排好的人生大事忽然要無限期擱置,依然令人沮喪。

過去大半年香港發生的事令人感慨,今日唔知聽日事,計劃追不上變化。但安慰的是,我找到信念一致的另一半,可以在艱難的時候互相扶持。為減少感染病毒的機會,避免拖累醫療系統,我和未婚夫都盡量多留在家。在家中一齊煮飯仔打掃、為對方按摩理髮、一齊睇書睇Netflix,都係增進感情的好活動。

復活節長假期嚟到,可能大家都好想出街玩見朋友,但大家都盡量忍耐啦。耶穌戰勝死亡,相信大家都可以戰勝沉悶,用 Jitsi Meet 或 Google Meet 同朋友 virtual hangout。時代抗疫,希望大家可以早日除罩在煲底相見。祝各位廢青肺清!

以上內容為作者個人意見。

Belle Woods@法政巴絲

(原文載於 2020 年 4月 11日《蘋果日報》)