只要係成年嘅永久性居民,每人都派1萬蚊,Super!

點解只係成年人先有?波哥話因為學生派咗囉喎!咁未成年又已經投身社會嘅呢?對唔字,你哋no stake in the society!

咁邊個最有stake?登登登凳⋯⋯係人都知,就係鵝鵝鵝唯一嘅依靠⋯唔係臥底波,而係三萬⋯就嚟三萬五嘅速龍喇!要加幾千人?要買6架裝甲車?要多幾萬粒催淚彈?要claim OT?無難度!攤大手板就加你四分一!

四分一係咩概念?你諗吓依家有幾多間公立醫院。加你四分一就多4間醫院喇!係咪好開心呢?本來急診室要等8個鐘,即刻縮短到6個鐘呀!(發夢啦你⋯)

最好笑嘅係,有個已完仲話應該再畀多啲錢速龍喎,話性價比高喎,仲攞自己啲行家比,話律政司1,000人都有20億喎!哈!啲已完真係越做越識計數。毅進畢業嘅人工,應該同律師嘅人工比喎(我真係唔知原來佢做已完之前係咁坎坷)⋯⋯早知我都去讀毅進啦!

講返1萬蚊,我真係多謝你呀!有啲人話寧願唔攞嗰一萬蚊,都唔好加畀速龍。

我就話,我估大把人寧願揼多1萬蚊出嚟,畀你成立獨立調查委員會,又點話啫!橫掂你連監警會嘅錢都cut。要私人檢控?我揼多2萬蚊出嚟添呀!

好癲咩?

係呀。依家好多香港人就真係咁癲,唔係點解咁多有心人日日派口罩呀?612、星火啲基金,點會籌到幾千萬咁多呀?你估真係洗黑錢咩?CIA真係會周圍派錢咩?

講起612,最近佢哋啱啱擴闊咗個資助範圍,連喺裁判法院審訊嘅案件都會資助。對我哋有無影響呢?其實係無嘅,因為佢畀嘅錢,同我哋做當值律師差唔多。

咁點解唔繼續叫啲被告,用當值律師服務?話晒用公帑幫有需要人士請律師打官司,係人權嚟㗎嘛?但用得公帑,就好多製肘。

想開多個會⋯有無特別原因呀?(你估如果你打官司,你想見幾多次律師先上庭畀口供吖?)

想去現場睇環境⋯係咪真係有需要先?(想再去多次呀?自己收工去囉⋯)

想睇閉路電視⋯當值律師服務嘅主任幫你睇咗先,話畀你聽淨係睇邊幾個時間得喇。(咁律師唔使全部睇晒?)盡責嘅律師當然會睇晒啦,仲翻睇、翻睇、再翻睇添呀!不過公帑唔會畀囉,唔通攤大手板就會加四分之一咩⋯⋯上年調整當值律師費用,係爭取咗10幾年先有㗎咋⋯⋯

話晒我哋又唔係鵝鵝鵝嘅唯一依靠⋯⋯

以上內容為作者個人意見。

衛庭官@法政巴絲

(原文載於 2020 年 2 月 29 日《 蘋果日報 》)