不論是律師樓或公司內,爭鬥無日無之、爾虞我詐、波譎雲詭… …(下刪3000字)。特別呢個亂世,面書出個留言、like 過吓某些新聞都可能被人篤灰,輕則被老細捉去照肺,重則被人炒魷魚。所以,好多同事喺公司內都不談政治,甚至扮藍絲!以下是我留意到適應力強頑嘅香港人喺亂世中生存之道。

第一招:扮無知

分化膠:「你個wallpaper 隻嘢,是咪叫 Pepe 青蛙呢?近排係網上好紅咁喎!」
唔好答佢,你答就中圈套,建議你扮無知再反咬佢:「係咩?乜佢叫 Pepe 咩?我以為係 KeroKeroKerope 呀!你咁留意網上嘅嘢架?你喺咪成日上嗰個咩 LaHKG 呢?」

第二招:扮苦主

「乜你又遲到呀?成十點幾先返工,噚晚出咗去夢遊呀?」
行使緘默權,唔係乜都答佢嘅,聲東擊西:「最衰個港鐵飛站囉!直飛咗過海,去咗中環都有!」

第三招:祝福佢

割蓆女:「依?你之前咪成日鬧人全家嘅?你呢排把口仲有無咁衰呢?」
唔好中佢激將法,閉目腦內唸 Sing Hellalujah to the Lord 十次:「無呀,我信咗主,個人無咁激動喇。呢排,我歌頌神多,我祝福佢都嚟唔切啦!」
「你個「福」字做咩有個尾音 k 嘅?」
「吞口水啫。」

第四招:溫馨提示公司守則

「班網民咁勁嘅?全世界登報紙咁多錢,個廣告設計又咁精美,一定有收錢啦!」
「你又知嘅?你有份收錢?公司守則第二章第六條話做 Part time 要申報畀 HR 聽喎,你報咗未?」

第五招:不分黃藍

篤灰王:「你知唔知Marketing係藍血人嚟架!佢話嚟緊萬聖節要扮「任何人」喎;客戶服務Jenny係黃色人,佢會扮「黃色物體」喎!你知唔知IT嗰個成日著黑衫嘅人會扮咩呢?」
「扮綠色嘅鬼口水囉,你咁多口水,浸都浸死人啦!」

三個多月來,「不流血、不受傷、不被捕、不篤灰、不割蓆、不分化」成為香港人座右銘。今日,白色恐怖籠罩全港公司,我們更要在工作上做到「不篤灰、不激動、不被炒」,不參與文革式篤灰惡行,不為小人閒言激動,更加要保留飯碗不被炒,為長期抗爭作準備。

賤婢愛迪立@ 法政匯思

(原文載於 2019 年 9 月 28 日《 蘋果日報 》)