【撰文:吳宗鑾-法政匯思】

是咁的。關於有人提議訂製「觀察 Polite」黑色背心示威遊行時著,已經有高手做咗相關嘅法律分析,不過我噚氣少少都係講多次  —  唔好試!

原因有時間可以睇下以下分析,冇時間就直接睇最尾一段。

首先,呢個做法起碼有機會中兩條刑事罪行:《簡易程序治罪條例》第21條,同埋《警隊條例》 第65條。

A. 《簡易程序治罪條例》第21條:

「任何人穿着並無資格穿着的制服屬不合法

(1)任何人穿着其並無資格穿着的制服,或穿着非常類似該種制服的衣服而刻意欺騙他人,可處罰款$1,000或監禁6個月:但如獲得警務處處長的同意,演員在任何公眾娛樂節目中穿着任何制服或衣服,則不構成本條所訂罪行。

(2)在本條中,制服(uniform)指英國軍隊、政府飛行服務隊、香港警務處、香港輔助警察隊或根據香港任何現行成文法則的權限而組成的任何部隊的成員當值時不時穿着的正式服裝,而服裝(apparel)包括各項裝備在內。」

件黑色背心好有機會根據第21(2)條屬於「服裝」的一種,即有機會被視為非常類似警方制服。但控方要證明穿著該背心的人士是「刻意欺騙他人」的門檻稍高,辯方或可辯稱印在上面的文字不同,有關的行動又早以透過互聯網公開,但被檢控嘅風險依然存在。

B. 《警隊條例》 第65條

「任何人如非警隊的成員,而未經處長准許而穿著警隊的制服或穿著任何具有該制服的外觀或附有該制服特殊標誌的服裝,即屬犯罪,循簡易程序定罪後,可處罰款$250。」

《警隊條例》本身冇就何謂「制服」或「服裝」作出定義,但如果參考《簡易程序治罪條例》第21條及依照常識判斷,有關嘅黑背心一樣有機會被裁定為「具有該制服的外觀…的服裝」

呢個控罪其實不是可拘捕罪行(arrestable offence),門檻較低(雖然罰則亦較低),控方不需要證明是否有人「刻意欺騙他人」便可舉證成功。(不過個人覺得呢條控罪未必合乎人權法:有人鍾意係屋企玩cosplay甚至著住去制服派對唔通又唔得咩?重點應該係有冇授權或有冇意圖欺騙他人先啱!)

無論如何,依家啲警察亂咁嚟,你喺示威現場着住呢件背心,佢哋隨時發起癲上嚟搞你,跟手拉你返去痞48小時,還掂佢都冇後果嘅!咁我哋又何必比位佢入呢?

原刊於作者 (吳宗鑾)Facebook ,標題由編輯所擬。

(原文載於2017年7月8日《立場新聞》)