話說早排我有機會同一班初中生做吓職業導向分享。由於佢哋年紀尚輕,其實佢哋都唔係好知有咩好問。不過有趣嘅係,喺我見到嘅組別入面都有學生問到:到底現實中做律師同埋睇電視劇有咩唔同?

其實隨住近年大家對做律師係點嘅好奇心越嚟越大,好多行家同埋我自己都已經寫過唔少關於律師嘅生活同掙扎嘅文章。不過當我解答佢哋問題嘅時候提到一樣嘢,之前比較少講到嘅,就覺得可以藉呢個機會分享吓。

呢樣嘢就係,到底做律師嘅人係咪一定好outgoing、好aggressive同埋好chur嘅呢?係咪一定要呢種人先做到成功嘅律師呢?

坦白講我讀緊大學時真係有曾經覺得因為自己唔識social所以覺得唔應該做呢行,尤其當以前想搵internship嗰陣,個個都去參加啲大firm嘅open house event。筆者去過兩次,講個秘密你哋知,其實我真係會怕醜,只不過啲人唔信咋嘛。嗚。

咁而家嘅心態又點呢?當然我呢啲啱啱出身嘅人唔會話因為我做到所以你都得咁樣,只不過隨住認識嘅人多咗,我發現咩類型咩年紀嘅律師都好,性格都可以好唔一樣。

喺好有經驗嘅前輩當中,有霸氣外露嘅,有鍾意周圍走參加活動嘅,有鍾意飲番一兩杯嘅,又有點都唔飲酒同甚少出席任何活動嘅人;喺庭上當然佢哋都係各有風格,節奏有快有慢,聲調有高有低。不過佢哋不約而同有啲共通點,就係要工作時就做足準備,因此不論你同佢私交如何,都會對佢有一份尊敬。

而即使係後生啲嘅律師,亦唔係每個都係一個樣。鍾意同人傾偈交流嘅固然有唔少,不過性格內向嘅分分鐘比你想像中多。寫到呢度我就諗起曾經共事過嘅一位人兄,佢平時比較寡言內斂,唯一口若懸河嘅時間就係傾case嗰陣,嗰種反差令你知道佢真心鍾意呢份工。亦有唔少女士平時相當溫柔,上到庭一樣不慍不火,收咗工又唔會特登去應酬,講到尾,都係建立咗自己嘅一套風格同處事方式。

呢篇文章雖然開放畀所有人睇,但我都確實係有寫作對象的,就係任何有志投身法律行業但又怕自己「性格不合」嘅人。能力固然重要,然而做法律呢行同樣重要嘅係記得自己做緊一門專業,記住自己對個客同對法庭有咩責任,同埋對自己做嘅嘢有興趣或者理想(唔係嘅話就算你有幾叻都會容易迷失)。至於有無話要成為某種特別的人,如果你想知我嘅答案,我就覺得真係無話要乜嘢性格先得,當然最理想嘅,就係你係一個好人。

藍天柳 @ 法政巴絲

(原文載於2019年5月11日《蘋果日報》)