事關重大,今次筆者都要借呢個專欄講一講港府就移交逃犯(俗稱引渡)相關安排嘅修訂。

首先,民間人權陣線會聯同民主派立法會議員喺‪2019年3月31日下晝3點‬舉行「反對修訂引渡條例」遊行,集合時間係‪下晝2點半‬,地點係‪灣仔盧押道‬修頓球場(側),法政匯思會派出成員參與,同時亦呼籲任何關注嘅人士企出嚟表達意見。

跟住落嚟會簡單講下點解反對修訂。政府今次好醒目,搵咗個道德高地嚟比自己企,話一定要喺今年7月前修訂引渡條例先至還到港人在台謀殺案的受害者一個公道,而且藉此將反對修訂嘅人都抹黑成為冷血人士、阻止公義獲得彰顯。

計我話,畀你咁樣貿貿然拎公義做藉口推個影響深遠嘅修訂先係遺禍人間呀。

第一,即使2019年7月前完成修訂,都唔代表殺人嫌疑犯會被成功引渡去台灣,因為台灣唔同意呢個修訂方式。

呢次修訂方案推出之前,港府並無同台灣當局商討過。有啲建制人士叻唔切走出嚟話係台灣叫港府咁樣做,結果就畀人走出嚟話一派胡言[註1]。而家台灣陸委會都明確表態話唔會接受目前方案,但林鄭嘅回應就係「不會撤回」[註2]──無錯,係企得硬到連同人溝通都唔願意;林鄭仲表示今次修訂唔係為單一個案,而係為整個機制填補漏洞喎。嗱,矛.盾.囉.咁.咪.係!如果你明知修訂完都幫唔到呢次個案嘅受害人,又講到個修訂係針對整個制度嘅,咁你訂條7月死線迫人就範又有咩依據?

第二,現時香港同中國無既定引渡安排,係對中國司法制度不信任嘅表現,而唔係漏洞呀。

呢一點喺大律師公會主席戴啟思嘅文章度就講得好清楚[註3]。而其實唔少反對修訂嘅人都表示,只要政府唔好要求一刀切推出方案,而係先將適用範圍收窄至台灣,不包括中國內地在內,就會同意修訂。如果港府真係咁為受害者家屬着想,實事求是的話,點解唔可以考慮呢個做法?政府要大家一次過接受整個方案係咪另有居心?

須知道中國內地嘅司法制度令人無信心唔係無原因。佢哋可以拉完人之後不審不判拘留人民(關鍵字:六四酒案);佢哋可以開庭但係唔通知家屬,令佢哋對審判過程懵然不知(關鍵字:秘密審判);仲可以名義上釋放咗都仲繼續軟禁你(關鍵字:維權律師、軟禁、江天勇)。呢啲個案都係冰山一角而已,但試問政府又可以點樣回應?
 
政府班官員仲成日話有法庭把關就唔使擔心,點解要成日將啲法官擺上枱?既然你知要人把關,點解又要將立法會對一次性移交嘅審核權拎走,改成由行政長官發出證明書?

順帶一提吖,如果內地嘅司法制度係咁健全,不如政府你又解釋下點解香港班商家而家會咁落力爭取唔好將商業罪行納入修訂範圍?

第三,想對付日後類似嘅罪行,唔淨止得修訂引渡條例呢個方法。

大律師公會較早前已經提出建議,將‪香港刑事法庭‬的管轄範圍,延展至同台灣殺人案相似嘅案件[註4]。而呢個建議暫時亦未引起太大反彈,請問點解政府又唔研究下呢項建議嘅可行性?

綜合以上各點,筆者覺得港府以公義為藉口推行修訂嘅機會真係唔細。其實筆者自問都係個諗法天真嘅人,真係唔想相信理應真誠服務香港嘅一班政府官員,實際上會為咗政治任務而恬不知恥地行動。可惜種種迹象都顯示你哋唔係真心想還受害者公道,亦唔會考慮點樣保障香港人嘅利益,筆者對你哋呢班偽君子真係好失望!在此亦希望各位讀者都會企出嚟,話畀政府知公義唔係佢哋用嚟作惡嘅藉口!

註1:《明報》3月8日報道:譚惠珠:修逃犯例非中央要求 稱「台灣提出」 陸委會斥「一派胡言」

註2:《now新聞》3月20日報道:台不接受修改逃犯條例方案 林鄭:不會撤回

註3:《852郵報》2月18日報道:【移交逃犯修例】戴啟思撰文解釋引渡協議 指兩地無簽訂或涉司法系統疑慮。原文見: https://bit.ly/2YhavlN

註4:《明報》3月8日報道:大律師公會反建議 修例准審境外謀殺案逃犯。另見意見書原文: https://bit.ly/2U6czOn

藍天柳 @ 法政巴絲

(原文載於2019年3月23日《蘋果日報》)