豬年第一篇「法政巴絲」專欄文章,筆者喺度代表法政巴絲仝人同大家拜年,祝大家新一年身體健康!萬事勝意!恭喜發財!既然係新年嘅第一篇文章,筆者借呢個機會同大家分享下行內新年嘅點滴。

筆者自己因為親戚一早已經移晒民,多年來我一家一到新年都習慣避年,一家人去旅行。自己屋企唔會點拜年,但反而自入行起,一到新年,就會好忙碌咁要同各位師父拜年(大律師呢行依然係行師徒制)。以前朋友成日話一到新年又有年糕又有蘿蔔糕食,筆者都係自從會同一眾師兄師姐去師父屋企團拜,師母會一底一底乜糕物糕煎出嚟,先有機會試到屋企煎嘅蘿蔔糕係咩味,原來有家嘅感覺嘅蘿蔔糕,係咁好味!

一到新年,WhatsApp就一定會收到來自不同親朋嘅祝福語,自WhatsApp有stickers功能後,以往又長又多emoji嘅賀年message被不同的WhatsApp賀年stickers取替。講開又講,唔知大家新年去拜年鍾意講咩祝福嘅說話呢?各行各業新年祝賀說話相信都會有唔同,例如筆者以前做政府,最驚聽到有人祝我「生意興隆」,大家見面都會祝大家「生意淡薄」,箇中原因不言而喻。有政府朋友唔知筆者已經離開政府,仲send個「生意淡薄」stickers過嚟,唯有祝返佢身體健康,順手提佢今時唔同往日,搵食艱難呀。私人執業嘅律師就當然要祝佢「生意興隆」,大律師作為自僱人士,好聽就自己做自己老闆,但現實係冇生意,租都交唔起。適逢豬年仲有「豬案全勝」,打親官司,逢打必贏。「恭喜發財」就當然人人啱聽啦,不過喺我哋呢行,要發財就要有官司,唔知咁又算唔算將自己嘅快樂建築於別人嘅煩惱身上呢?

除咗WhatsApp stickers,新年當然少不了利是,今年法律界最紅嘅利是不得不數某大律師樓設計嘅「豬hi」利是封!今年又係豬年又係亥年,設計師別具心思將「亥」字融入豬公仔內,豬身再加個「hi」字畫龍點睛,希望筆者放完新年假都可以收到「豬hi」利是啦!

何天晴 @ 法政巴絲

(原文載於2019年2月2日《蘋果日報》)