《流傳笑話一則》 兩個law友走入茶餐廳,叫咗兩杯飲嘢,然後各自各喺公事包攞咗份三文治出嚟食。餐廳老闆見狀即刻大聲叫囂:「喂!呢度唔俾食自攜食物㗎!」兩個law友聳一聳膊頭,你眼瞄我眼,之後就交換咗各自帶嚟嘅三文治食。

律師俾人印象不嬲都係死都可以拗番生,有權威、人工高,君不見香港嘅狀元呀、尖子呀爭住讀。明明係資優尖子因為冇揀讀醫呀、讀law呀,人哋爹哋媽咪呀、Aunties世叔伯呀就即刻使出國粹絕技「變臉」,標籤佢地冇料到。問題係:點解一定要揀呢啲科目先?Everyone has his/her own path,但香港就係流行吹呢股「瘋」。

咁當然,律師唔係瓣瓣通。八八卦卦聽某某C9講話嗰啲幼稚園呀、小學呀校長唔係好like收律師嘅仔女。何解?驚佢哋小小嘢就發律師信,郁啲又話仔女比人bully,學船頭尺話齋「茶煲」!講真,我哋啲律師仔「並非特權」,出律師信告人呢科嘢我哋又點夠前特首厲害啊。

多得電影、電視劇塑造,律師形象一係好似古惑仔咁,一係大義懍然正直不阿,一係day day happy hour,令人趨之若鶩。實情我哋咪又係人一個,好多時都要24/7 standby,半夜仲要爬起身同美國客conference call。最近陪家人放暑假旅行,以為可以好似旅行青蛙咁消失一陣,點知又係日日覆公司emails,仲要check哂WeChat呀、Snapchat呀、WhatsApp呀驚覆漏客人或同事啲messages。#唔覆message係大罪

最伏係啲客以為律師乜都識,攪到我哋精神壓力好似高鐵咁超哂支…有時喺公司做得夜,去厠所洗個臉,照鏡見到自己個鬼樣,都真係嚇一嚇。

查實我哋又唔係與神同行邊可能「通識」?呢行有唔同專業範疇,大家只可以喺能力範圍內盡做,借昔日大台嗰句:「全力以赴,做到最好!」絶對唔會效法馬主席嘅:「我哋話俾你聽OK就得㗎啦!」

套用子華神18年金句「面斥不雅」,腦細未放工我哋又點敢放工呀,就算腦細放咗工都係繼續做,work life balance好生面口喎!做大嘅都唔係着數哂,面對so called尖子嘅新仔,個個自命有不凡質地、牙尖又嘴利,一唔開心就話唔撈;做腦細唔單止要頂著上面啲客,仲要氹埋下面啲細嘅,嗰種夾心階層嘅壓力秒秒鐘爆過壓力煲、熱過登革熱。

都係嗰句啦,依家做律師又好,做邊行都好,俾腦細鬧又好,俾新仔激親又好,俾客狂炳都好,都只可以笑一笑自我催眠式咁同自己講:「哈哈人工包埋,哈哈人工包埋,哈哈人工包埋…….。」

無定向喪心病狂間歇性全身機能失調症 @ 法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

 

原文載於二零一八年九月一日《蘋果日報