六至八月對大學生嚟講通常係SEM BREAK(暑SEM的朋友例外啦)。想當年我仲係讀緊書嗰陣,同啲同學通常都係問幾條問題,由最普通嘅「有咩搞呀?」到充滿期盼嘅「去邊度玩呀?」再到非常現實嘅「有無做intern呀?邊度呀?幾多份呀?」等等。

對於一定數量嘅實習大律師嚟講,六至八月就係「call左」(正式取得大律師資格)後但又仲係serve緊pupillage嘅日子。呢啲時候大家見面除咗問「你而家跟邊個呀?」之外,就係「你搞左limited practice未呀?」

我好多朋友,一聽到limited practice就會即刻問係咩嚟。「即係淨係可以做最細啲case?」真係唔使睇都知我位鍾意睇大台劇嘅朋友Mandy(係呀又係佢啦)有幾期待我做大case,不過一出嚟就接大case呢啲嘢--ff太多會傷身架。

但事實上,limited practice(有限度執業)又真係唔係解只能夠做某某種案件喎。其實有限度執業可以話係實習大律師嘅獨特執業模式:因為仲係實習期間,所以如果有律師搵你做嘢,你就可以問下你師父係咪畀你去接呢單case。通常師父見到徒弟有生意,都會好支持佢地去接,由得佢地安排時間去做自己嘢,而同時自己都會有supervise徒弟嘅義務。有限度嘅意思,就係師父都會睇下你嘅能力有無可能應付到單案件,又或者你實習嘅期間係咪適合去接。

所以,呢種執業模式個名雖然係有限度執業,但係有實力又有人品嘅話,做大case上高院都有機會㗎!(只係這些機會不屬於……唔講喇。)

好多pupil barristers變左barrister-at-law之後都會立即申請limited practice,一嚟可以盡快拎經驗,二嚟都想賺點生活費嘛。不過又唔係個個都會咁諗,疊埋心水諗住完成實習先執業嘅都大有人在。不過可能因為呢行競爭越嚟越大,「你搞左limited practice未呀 ?」幾乎變咗句問候語,我仲試過聽到有朋友答完「無呀!」之後俾人以為佢講大話添!其實出嚟做嘢點樣選擇就同大學生安排實習一樣,每個人都有自己嘅步伐嘛。無論呢刻係咩階段都好啦,呢度都祝各位同行未來嘅發展順順利利呀!

藍天柳 @ 法政巴絲

原文於二零一八年七月七日刊於蘋果日報