大家經常話做法律界競爭大、壓力大,呢啲都係事實嚟──不過,由我讀法律開到實習嘅呢幾年,都會見到好多值得感恩同欣賞嘅人同事,當我有時候諗埋一邊,只要諗返起呢啲嘢又會多返啲力量。

由入law school開始,我已經聽過唔少關於法律系同學有幾進取嘅傳聞,例如有人特登將啲參考書,放喺其他人見唔到嘅位置等。之不過當我自己讀law嗰陣,就覺得我有好多好好人嘅同學。其實大家都知道讀law係辛苦,與其鬥生鬥死,不如互相幫助(例如係互相交換sources啦,呢樣嘢好緊要㗎嘛係咪先?)仲記得有次練習做得好差,我忍唔住喊,結果即時有幾個同學圍住安慰我,事後仲有人send訊息畀我問候我。所以我覺得law school都唔一定係一個冰冷嘅地方,同學之間總可以真誠相待。

仲有,我就試過因為同啲同學仔鍾意一樣嘅動漫,而組咗一個群組,大家有時一齊玩下交流下,真係會好開心,大家一啲機心都無。不過,喺呢個群組入面,其中一位成員已經離開咗我哋,喺呢度我都好想同佢講聲:「多謝妳以前友善地對待我,一路好走」。

講完讀書,又講下出嚟做嘢之後嘅見聞喇。話說我曾經親耳聽到一個A大律師講:「I do it out of love」。何出以言?因為A大律師嘅客人係佢以前嘅徒弟,但打官司嘅原因,正正係同徒弟搵錢艱難有關,所以A大律師就免費代表佢……唔係話一定要免費幫人做嘢,先係好律師,只係A大律師為咗佢徒弟,不計成本咁付出呢件事,真係令我好感動,尤其A大律師自己都咁忙,驅使佢咁做嘅,應該真係包括愛錫徒弟嘅心。

又試過有一次,B大律師遇著一個好固執嘅客人,有個大好嘅調解方案都唔接受,其中一個原因,係因為怕律師費會食咗一大筆。B大律師竟然同呢個客講話:「算啦,唔使計我嗰筆喇」。事後B大律師話因為個客年事已高,仲有長期病患,唔想佢輸咗會變得好坎坷,而佢自己打官司唔淨係為錢,所以有呢種諗法。講真,B大律師嘅做法,未必個個都會認同,有啲人會覺得你用咗咁多時間去準備,點解唔收返應有酬勞呢?但我想討論嘅,並唔係呢種做法係咪最好,而且每個個案都唔同,只係B大律師嘅諗法,再次令我肯定,做律師嘅人,唔係好似有啲人咁講一定係衰人、一定會違背良心。

唔好話我賣花讚花香,其實入到嚟法政匯思之後,我見到更加多有學識、有信念同有毅力嘅同行,願意不計回報咁去貢獻社會。呢一點亦令到我搵到更多堅持落去嘅意義。因此我都想藉此機會同咁多位巴打絲打講句:加油!仲有多謝你地啟發我更多!

藍天柳 @ 法政巴絲

(原文載於2018年5月26日《蘋果日報》)