剛剛個星期三(4月25日)係秘書節,我同我秘書Ivy去食咗個靚lunch,送小禮物同派利是畀佢當然亦唔少得,因為Ivy真係好幫到手。

食飯嗰陣Ivy話佢有朋友Amy,喺隔離嗰間大行做秘書嘅,秘書節收到嘅禮物係……登登登凳……8粒提子!仲要係一般超市買到20蚊磅非香印、非巨峰、非自家種、冇包裝、冇特別嗰隻!Ivy話Amy見到行政部同事拎住抽(相信有64粒)提子同把鉸剪行埋佢度嗰陣佢都好愕然,到同事剪8粒提子畀佢同話係行政部阿頭請佢食嗰時,佢先諗起,佢嗰間行吸甲醛都係靠菠蘿,可能嗰8粒提子可以幫助排毒、延年益壽呢。多謝晒。

講返Ivy,同唔少律師樓嘅秘書一樣,除咗識訂枱同印嘢之外,仲識草擬啲簡單嘅信、整文件冊(呢個緊要,因為有啲法官同大狀係會因為個文件冊唔合心水而大發雷霆)、安排法庭文件派遞、整理文件(包括重要證據)、出單追數等等,總之十項全能!

除咗做得嘢之外,我覺得秘書嘅操守都好緊要。例如要盡保密責任,唔可以出賣老闆行蹤就當然啦,同律師一樣,佢哋唔可以洩露客人任何事情,包括客人搵過律師都唔可以講;喺工作時接觸到上市公司嘅內幕消息,都唔可以自己或促致其他人就此進行交易搵錢(犯法㗎!)等。咁多要求,唔怪得有啲律師樓嘅秘書,人工會高過有啲律師樓嘅見習生,甚至初級律師。

除咗人工高之外,大行秘書呢份工仲有其他吸引力。有啲讀緊法律嘅半工讀生會喺律師樓做秘書,學嘢之餘亦希望近水樓台畢業後快啲搵到工;另外,我聽過有啲年輕貌美嘅女仔(無性別歧視,我聽到嘅故仔主角真係女性)入律師樓就係想搵個律師老公,而我間行有個合伙人嘅太太就正正係佢以前嘅秘書。

可能係隔離飯香,壓力大嗰陣我都幾羨慕我秘書,起碼唔駛放咗工都睇電郵同好攰想休息飲茶嗰陣都俾三姑六婆問法律意見,人工又唔係多好多。不過咁,同法政匯思嘅成員一樣,可以以律師身份為法治略盡綿力,我與有榮焉。最後,再次多謝Ivy,我心目中的最佳秘書!

Alexa Stone @ 法政巴絲

(原文載於2018年4月28日《蘋果日報》)