法政匯思上周六同傳媒茶敍,同時亦係一班法政男神表演廚藝嘅好時機。咪以為佢哋浪得虛名,好似召集人吳宗鑾Chris咁,原來以前喺餐館做過,由廚房到樓面、水吧都難唔到佢,佢即場炮製一味看似平平無奇嘅蒜香芝士麵包,當佢由焗爐拎啲包出嚟後,瞬間已經被掃清,可見幾咁受歡迎。

蔡騏玉子燒vs Jason’s nachos

a1004b.gif

另一位法政男神、美國執業律師Jason Y. Ng亦有料到,佢示範嘅係墨西哥粟米脆片(nachos)配雞肉,啲雞肉佢早一晚已經醃定,喺現場將雞肉、橄欖等配料放上去,再焗一焗,同Chris嘅包有得揮。出名靚仔嘅蔡騏亦唔弱,負責整嘅玉子燒色香味俱全。

反而新一代男神楊嘉瑋就要急起直追啦。佢都算係法政嘅新成員,暫時仲係見習大律師,不過來頭都唔細,本身已經係男拔10A生嘅佢,因為拎過牛津大學香港區羅德獎學金而接受過《蘋果》訪問。佢話將來希望多啲做人權、同志平權嘅議題!

李八方

(原文載於2018年4月23日《蘋果日報》)