「法政匯思」今日同傳媒茶聚,新任召集人吳宗鑾(Chris Ng)同一班核心小組成員,親自下廚整咗啲小食招呼記者。Chris舊年已經喺傳媒茶聚上大顯身手,今年佢就整咗蒜香芝士麵包,Emily同一眾行家都讚不絕口。

新加入核心小組嘅美國執業律師Jason Y. Ng亦都係廚藝高手,佢整咗墨西哥小食nachos。原來佢中學喺意大利讀書,所以經常會下廚整意大利菜,仲會招呼朋友去佢屋企食飯,最多人嘅一次招呼咗接近40人,包括被控佔領運動前夕衝擊政府總部東翼前地嘅「雙學三子」、因為反新界東北案而被控非法集結嘅13人、同埋律師團隊等。

另一位核心小組新成員係律師陳信忻,佢話自己比較少下廚,不過平時有喺粉嶺高球場隔離嘅農地種有機菜,噚日仲帶咗啲紫蘇葉沖茶畀大家飲。

Chris透露,法政匯思今年計劃同教協合作,製作關於法治嘅資料畀通識科老師參考,亦研究最近好熱門嘅動物法,遲啲會出「懶人包」同埋開講座,向市民講解一啲同動物有關嘅貼身議題,例如一對夫婦離婚嘅話,寵物會跟邊個等。

(原文載於2018年4月21日《明報》)