「Steve Jobs will love you!」大狀Ben對合伙人Jerry說,面上掛住一個好有深度嘅笑容。事緣Jerry見到大狀上庭嗰陣用兩個iPad(因為要同時睇多份文件,一個螢光幕唔夠用),已經頂得住Jerry同我帶嗰10個三吋文件夾,於是Jerry落庭後,問大狀iPad好唔好用,又問「係咪一個iPad只可以裝一個case啲嘢?」我企喺側邊真係笑咗,心諗「你以為係膠folder咩!」大狀答得妙!梗係啦,你一單案一個iPad,蘋果公司仲唔愛死你?

都未完喎,話說嗰單案嗰個官都忽然好欣賞iPad同電子文件呢單嘢,又話宜家唔駛去電子法庭,都可以有好多高科技嘢用,於是叫各方律師同法庭資訊科技部聯絡跟進下。結果幾日後,各方一共四個事務律師,按法庭資訊科技部指示去上堂,講者係法庭資訊科技部大佬,另外仲有約10個法庭職員在場,嚴陣以待咁款,我好興奮諗住有勁嘢聽,原來……頭15分鐘係講喺法庭用電子文件嘅好處,如慳紙;之後係教你點開PDF,例如可以去頁數嗰度輸入11,就可以去到第11頁。真係獲益良多,終生受用。同埋多謝呢一堂畀咗兩個鐘收費時數(billable hours)我。

今年財政預算案有500億撥畀創科基金;司法機構呢?有約20億,當中有幾多用來搞IT,以「確保司法機構和各級法院與時並進」(財政預算案用字),我唔知。噢!咁我明喇。500億貌似搞到智慧型燈柱同磁能線嗰類嘢,畀你用晒20億去搞法庭資訊科技,係教到你開PDF咁上下。

我間律師樓嘅預算,當然冇20億咁多,所以我都唯有接受冇高端電腦、系統慢同成日死機呢個事實。但有一樣嘢,真係低端到我接受唔到……話說我間行隔離裝修,成陣天拿水味,空氣好差,有同事聞到敏感,關節腫兼頭暈,同事開「行」自備嘅空氣清新機都搞唔掂,公司人力資源部結果喺某合伙人嘅同意下,買咗四個菠蘿,切開再喺辦公室放到周圍都係,話吸味喎。(之後唔知邊個再放咗啲檸檬、薑同洋蔥,喺啲菠蘿隔離,抗流感咁話喎!雜果賓治賜我力量!)大佬呀,就算你吸到味,都唔代表吸到甲醛同重金屬啦!仲未計惹烏蠅曱甴呢啲衞生問題。OK,我知道呢件事唔關資訊科技事,但係見微知著,原來真係有啲人嘅思想停留喺未有空氣清新機嘅年代。叫佢哋與時並進?可能仲難過要菠蘿吸甲醛。

當然唔係成個法律界都唔識電腦、唔與時並進嘅,如大狀Ben、Zegal(前稱Dragon Law)創辦人等,不知幾高端。但係點樣先會有系統性改變呢?Steve Jobs你教下我。

Dericca C. @ 法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

 

原文載於二零一八年三月三十一日《蘋果日報