前幾日同朋友仔去睇音樂會,會上有嚟自唔同各地嘅團隊表演。

其中一隊好特別,佢地嘅成員身處於幾個唔同嘅國家,每次見面都限於表演前中後。不過正因為咁,佢哋好珍惜呢份跨國嘅情誼。為咗紀念呢一點,並傳遞世界和諧嘅訊息,佢哋就編咗首好特別嘅歌──將部份歐美國家嘅國歌改編同串連埋做首Medley。

講真,一班有音樂天份嘅外籍男士聚埋一齊唱歌,聽得又睇得,係好charm㗎!只係中場休息嗰陣,我哋都忍唔住討論……

我:「吖,唔知如果入面有中國人會點呢可?會唔會mix埋首國歌入去?」

呀草(化名):「嗯,咁個旋律應該唔會幾夾……」

我:「都係呀……」嗱!我哋話旋律唔夾咋!無特別意思㗎!

呀叔(都係化名,因為佢似個大叔):「好唔好聽都其次啦,咁做會唔會犯國歌法呀?」

我:「我都唔知係咪犯法喎。」

唔係玩佢,係我真心唔知。

睇返政府為「國歌法」進行本地立法而提出嘅建議,有條話「任何人公開及故意篡改國歌歌詞、曲譜,以歪曲、貶損方式奏唱國歌,或以其他方式侮辱國歌,即屬犯罪,一經定罪,可處第5級罰款及監禁3年」。

嗱!睇清楚個「或」字喎,即係犯法嘅方式有成3種,其中一種就係「公開及故意篡改國歌歌詞、曲譜」!

公開及故意有幾難中?答案就係好易囉!字面上睇,唔理你改得有幾掂都好,你都可以係犯法喎!好似呢隊樂隊咁,就算佢出於善意,去搵段國歌remix下然後表演,都係又公開又故意㗎喎。萬一執法者認為,將中國國歌同其他國歌remix埋做一首歌,「有損國家主權」,係咪又可以拉人呢?

呢個情景唔係我作出嚟㗎。音樂會係真,首medley係真,我哋嘅疑問都係真。不過而家政府想立一條含糊不清嘅法例,特首就想以一句唔好「過份憂慮」,加啲似是而非嘅解釋,嚟釋除大家疑慮,又有社會人士明言,唔想以身犯險,就唔好做二次創作囉。喂,而家講緊立法喎,咁不明不白咁立條最高監禁3年嘅法例,豈不比拍拖時女朋友一句「唔准唔錫我呀。唔係就分手啦,你咁驚咪對我好啲囉」更刁蠻?

唉,兩個人嘅感情都無得迫啦,何況係幾百萬以至十幾億嘅市民?迫出嚟嘅「愛國」,算乜鬼嘢愛丫!

藍天柳 @ 法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

 

原文載於二零一八年三月二十四日《蘋果日報