明日又選舉喇!

吓?又選?唔係選完無幾耐咩?咁煩㗎!

係,因為政府DQ(即取消資格)咗6個民選立法會議員,其中4個席位現在要補選。

我都覺得好煩。畀你選,選完仲要返咗工成年,佢先話唔畀你做。如果係咁唔鍾意,早響嘛!夠膽咪話只准親政府的人去選囉!又要扮民主扮合憲。好似某啲港女咁,你問佢食咩,佢就話無所謂,到你提議,佢又呢樣唔得嗰樣唔好。咁你出聲嘛!又要扮順得人扮無所謂。好彩我女朋友極爽快,唔洗我估。

政府個預算案不知所謂,巴士公司又欺壓員工,好令人沮喪。我怕煩,去咗睇戲逃避現實。見到 The Shape of Water(港譯《忘形水》)攞咗奧斯卡最佳電影,又係愛情片,女朋友應該鍾意啩?觀後感係:套戲係拍得幾靚,帶科幻又有童話的色彩,演員們都表現不錯,劇情緊張得來亦有黑色幽默笑位。

(警告:以下嚴重劇透,未睇又想睇《忘形水》的讀者請跳過這兩段。)但問題係我睇得唔入戲。唔知係咪太理性的關係,我一路睇一路心諗,咁大件國家機密,又會無掩雞籠咁畀清潔女工自出自入啦。睇到片中「經典」浴室翻雲覆雨一幕,雖然畫面幾唯美,氣氛又好似好浪漫,但我差啲笑出嚟。首先用水龍頭開水,當啲水去到水龍頭嘅位置時,個水壓就應該令到水龍頭再出唔到水,所以啲水係無可能放到去天花板嘅。再者,啲水多到連階磚木板都頂唔住,要滴落下層嘅時候,區區幾條毛巾又會頂得住啲水唔水浸咗個廳,真係好神奇。

我以爲感性的女友會有唔同睇法啦,誰知佢都覺得唔入戲。佢話身為女性,雖然明白女主角很憐惜戲中的兩棲動物(人魚/蜥蝪?),對他的遭遇深表同情,而他亦不介意她的缺陷,無條件接受她,但完全感受不到兩者如何產生愛意。他的所謂接受她可能只是因爲他依賴她的幫助逃難,而她則是非常寂寞,沒人聽她傾訴,但這跟愛情還有一段很遠的距離。就正如你很疼惜你的小狗,牠也無條件愛你接受你的短處,但你不會跟牠共赴巫山吧?喜歡這齣電影的人可能會說女友是衛道之士,不能接受人獸交,但她只是純粹地覺得導演未能說服她主角之間有的是愛情,充其量只能說兩者是好奇和利用對方洩慾吧了,所以除了畫面,故事好像跟浪漫沾不上邊。

我哋比較欣賞的係戲嘅中文名,雖然我哋感受唔到,但故事想表達的,應該是真愛不在乎外在的色相,所以《忘形水》比起英文名The Shape of Water(即係無形啦,除非結咗冰)更能表達主旨。

其實近期睇過的戲中,我比較鍾意 Three Billboards Outside Ebbing, Missouri(港譯《廣告牌殺人事件》)同 Get Out(港譯《訪‧嚇》),但我無份投奧斯卡。

我有票的,係立法會補選。係,好煩,好懨悶。選完又唔知會唔會畀政府用藉口DQ甚至追索薪津,有汗出無糧出。選完個議會一樣係畀保皇黨話事。但,勿以善小而不為。有票的,要去投!

311去投票!去投票!去投票!

林日君 @法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

 

原文載於二零一八年三月十日《蘋果日報