大年初二朝早,我收到嚟至chambers嘅電話。

「喂,咩事?」其實我仲未瞓醒,但就要chok一把醒嘅聲。

「你未瞓醒喎。」師父唔好咁啦,我好努力chok聲架啦……

「講呢啲……咁係咩事?」

「我返到嚟一個人都無嘅。」

「……前日問你,你話唔使返嚟吖嘛 。」

原來佢記錯咗我應承咗要返去,結果呢,開年第一個電話,我連恭喜發財都唔記得咗講。

聽人講話,我呢位師父一年365日除咗年初一都會返工,起初我都唔係好信,不過而家我信了……尤其當我年初四朝早中午同晏晝都收到佢電話嗰陣,我就堅信佢喺紅日都經常會返工。正如佢自己講,「there’s no holiday to lawyers!」

如果電視劇可以寫埋呢啲情節,一眾律師們應該會有共鳴好多!

(睇到呢度唔好話我唔理師父喎,我都試過Boxing Day返過去幫手㗎!)

講開又講,前嗰排《壹號皇庭》翻做,播緊最尾嗰季時,有幾次我望電視都係望到啲談情說愛嘅情節,圍繞住Michael點樣同女律師A談情再分手跟住同咗第個女律師B一齊最後又同返前度復合……呢個時候先知原來愛情戲都係套劇嘅重點!

現實中係咪有咁多律師同啲同行有咁峰迴路轉嘅感情生活我就唔知喇,不過如果有嘅都應要小心啲,因為律師圈子唔算好大,有咩事真係可以傳開晒。就連我呢啲行內嘅小小薯,都見過為私人糾紛而發公開信嘅事例……

不過我又諗起,有次同個年青有為嘅男Counsel 飲茶,佢喺度講話自己完全唔會諗拍拖,因為淨係做case都已經做到無晒時間,好彩佢唔會有時間睇電視,唔係應該會好羨慕啲男主角忙極都會有豔福嘅主角光環。唔信?睇下之前王浩信飾演嘅盲俠,幾危險都有人同佢出生入死喎!唔知一眾仍然單身嘅男律師又會唔會憧憬咁刺激嘅愛情故事呢?

藍天柳 @ 法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

 

原文載於二零一八年二月二十四日《蘋果日報