法政匯思最近有新人登場成為召集人,就係2015年先至成為大律師嘅吳宗鑾(Chris),相信唔少人都知,48歲嘅Chris未踏足法律界前喺IT界打滾,但相信大家未必知道,其實佢同時都係一位詩人,17、18歲已經開始用筆名寫詩投稿,最鍾意嘅係新月派,自稱「為賦新詞強說愁」。

查實呢種文學詩意,喺香港比較難培養,而Chris都不諱言,可能同佢未夠一歲就跟屋企人去咗台灣有關,一直至中學時代先返香港生活。佢讀嘅第一間中學喺唐樓,「讀讀吓仲執咗笠」,之後去咗陳樹渠,中四派位後入咗寧波第二中學。佢自稱讀書唔多叻,卻愛睇小說等課外書,好鍾意文學同文字,「好似而家啲文青咁㗎,哈哈!」

中五後半工讀,喺渣打做過兼職teller,亦教過人畫畫,同時喺七仔做過part time,儲夠錢就去咗澳洲升學,入咗墨爾本大學修讀政治及經濟,都有喺唐人街打工幫補吓學費。

一直無諗過畢業後喺當地搵工,97年時值回歸年時返港,「都話我係大中華膠,覺得要返香港,但又無諗住返台灣喎」。適逢科網熱潮興起,佢同大學同學創業搞IT,「我又吹得兩嘴,其後搵到投資者,半賣半送咁畀間公司收購咗。」

嗱嗱嗱,重點呢度其實先開始,皆因代表嗰間公司負責傾收購嘅人,正係現時嘅吳太,Chris引述太太當年被CEO問到會面詳情時話喎,「間公司冇乜嘢,但個阿Chris就OK喎」,結果佢就入咗公司同太太做同事,雖然唔同部門,但大家日以繼夜、夜以繼日搏命,有時捱通宵就一齊食飯,結果……The rest is history,兩人育有兩小朋友,一家四口樂融融,當年Chris要到英國倫敦政治經濟學院讀法律碩士,太太都辭工陪佢一齊過去。

而如果冇民主動力,Chris其實未必轉跑道到法律界,事關06年加入民動後,不時同唔少政壇重量級人士接觸,對政治同法治大開眼界,佢仲同時任民動負責人蔡耀昌結下不解緣,兩度幫蔡耀昌區議會選舉助選,「就連西裝同條呔,都借埋畀佢㗎」。

 

原文載於二零一八年二月十二日《蘋果日報