連美國國務卿都忍唔住鬧佢「白痴」嘅特朗普,一定係美國近幾十年來最受爭議嘅總統。佢唯一帶挈,就係令原本演技麻麻嘅艾力寶雲(Alec Baldwin)成功突圍。艾力寶雲嘟嘴扮特朗普,形、神俱似。又咁講,扮老特搞笑真係冇乜難度,佢本身就係一個笑話。

艾力寶雲攞到美國電視界最高榮譽艾美獎奬項後,勉勵同業話:
“When you die, you don’t remember a bill that Congress passed, or a decision the Supreme Court made, or an address made by the President. You remember a song. You remember a line from a movie. You remember a play. You remember a book, a painting, a poem.

What we do is important. And for all of you out there in motion pictures and television, don’t stop doing what you’re doing. The audience is counting on you.”

這話不假。

例如,每次長假期之後(即係今個禮拜),我都諗起星爺「年初四咁嘅樣」,即係「假又放完,錢又洗晒,工又要返,點會好樣呢?」

又例如,每次寄出十幾份求職信都泡湯時,我就諗起子華叫我地作出「結構性轉型」,即係「填履歷時…三隻字:隆了胸,我包你有面試。」

當高呼「殺無赦」、「斬頭」嘅邪魔妖怪當道時,我就會念古人文天祥喺獄中作嘅「正氣歌」:天地有正氣,雜然賦流形。下則為河岳,上則為日星。於人曰浩然,沛乎塞蒼冥。

又當母親埋怨我唔返屋企飲湯,老婆話我冇時間陪佢,我就會高唱Beyond「原諒我這一生不羈放縱愛自由…」。

好嘅書、好嘅詩、好嘅劇本、好嘅詞,每每能觸動人心。套用喺律師樓嘅層面,好嘅供詞、好嘅意見書,可斷定一宗案件嘅勝、負。好嘅判詞,律師會引用,法律學生甚至會背誦。

譬如,英國侵權行為法中,最重要嘅案件Donoghue v Stevenson,原本只係一個約朋友喺咖啡店飲有薑啤同雪糕嘅蘇格蘭特飲嘅故事。咁當然後來發現酒樽內有腐死蝸牛,Mrs Donoghue個肚咕嚕咕嚕,後來更被診斷為患有腸胃炎同驚嚇症狀,而上議院最終裁定被告啤酒生產商有對消費者嘅照顧責任,成為當時經典。一個喺1928年約朋友飲酒嘅故事,相信連Mrs Donoghue都估唔到會演變成律師界中家傳戶曉嘅權威性案例,喺呢八十幾年來,佢本人個名仲不停被律師或者學生叫住。

就係咁,人生其實同權力遊戲(Game of Thrones)嘅劇情一樣,都係咁估你唔到。做人、做事,最緊要相信what we do is important。可能我臨死前嘅唯一回憶,係黃色雨傘、連儂牆、Beyond,同埋我希冀嘅雨後彩虹。又或者,屆時我哋已經有「真」真普選,仲有個好似Emilia Clarke咁樣「樣」嘅人做女特首,而我就剩係記得子華話「男人出嚟抗議,最緊要係乜嘢?護陰!」瓜咗。

孫公公@法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

 

原文載於2017年10月14日《蘋果日報