以前,依個專欄叫做「法政匯絲」,好似係「絲打」先可以投稿。依家改咗名,叫做「法政巴絲」,我終於可以用一個「巴打」嘅身份,喺度同大家分享少少嘢。

我係一個「巴打」,依家同緊另一個「巴打」拍拖。我係Bi嘅。

近年嚟,LGBT呢個term成日聽到,呢個term係Lesbian(女同性戀者), Gay(男同性戀者), Bisexual(雙性戀者), Transgender(跨性別人士)嘅縮寫。有時,有人會加埋其他族群,例如Q(Queer,對性別認同疑惑的人)同I(Intersex,雙性人)。而中文,一般就統稱「性小眾」。

有啲朋友可能唔識分「性傾向」同「性別認同」。一個男同性戀者鍾意嘅對象係男性(性傾向),但佢生理上有男性嘅器官,而自己亦認同自己嘅男性身份(性別認同),所以佢屬於「順性別人士」(Cisgender)。但係,如果佢生理上有男性嘅器官,但係自己認為自己係女仔甚至想用女仔嘅身份生活,咁佢就可以稱為「跨性別人士」(Transgender),或者,就佢而言,係「跨性別女子」(Trans-woman)。同樣道理,生理上係女性嘅人,性別認同係男性,就係「跨性別男子」(Trans-man)。一個跨性別女子都可以鍾意男性,或者女性,或者兩樣都鍾意;係唔係同性戀,同係唔係跨性別,其實係兩樣嘢。

所以有時啲絲打叫我「sister」,我都會講:「叫番我『brother』啦!」雖然我鍾意男仔,但係我嘅性別認同都係男性嚟。

不過,喺社會嘅討論之中,大家有時難免會將不同嘅概念簡化同歸類,例如將L、G、B、T歸為「性小眾」一類。當然大家喺社會上都受到歧視,但係每個族群面對嘅問題,甚至係每個人面對嘅問題,其實都有分別。

政府依家就「性別承認」作出諮詢,諮詢期到今年10月31日,其中一個最具爭議嘅議題,係一個人應否需要接受性別重置手術先可以改變法律上嘅性別。之前去咗一個關於性別承認嘅講座,有跨性別嘅朋友作出分享,講到佢哋面對嘅問題,例如入境被人查問、去廁所、用更衣室出現尷尬、接受手術嘅風險等等。呢啲問題都未必係其他同志會體驗到嘅問題,而係跨性別人士呢個族群,獨自要面對嘅難關。而喺跨性別人士之中,唔同人又有唔同嘅經驗,例如有啲人嘅身體狀況未必適合接受手術,有啲人嘅性別認同又並非係傳統嘅「男」或「女」等等。

呢一刻,我就知道,其實將「L、G、B、T」硬湊喺一齊,當係同一樣嘢,係幾咁粗疏。雖然我都係LGBT群體嘅成員,但係唔可以自大地認為自己好了解呢個群體其他人嘅困難。

平權運動,一個重要嘅原則係尊重個人差異。可惜喺社會討論中,呢一啲歸類好容易掩蓋咗唔同人唔同嘅需要,甚至誤導咗大家,令大家以為A等於B,以為佢哋嘅需要一樣,以為幫到A,就等於已經幫到B。

一套完善嘅性別承認制度,可以話係對跨性別人士相當重要嘅保障。變性人婚權案喺2013年有終極判決,當時終審法院已指出,立法機關就性別承認機制立法,實屬可取。到咗4年後,政府先推出諮詢文件。平權仲有漫漫長路,例如反歧視法、同性婚姻/民事結合,都係香港無可避免要討論嘅議題。

最後,希望大家可以多啲了解跨性別人士,以及就政府嘅「性別承認」諮詢文件踴躍發表意見喇。

法政匯貓 @ 法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

 

原文載於2017年9月16日《蘋果日報