我認,高鐵嘅嘢,我真係識條鐵。

內地官員可以喺香港境內(西九)執行內地法律,點睇都唔符合「全國性法律除列於本法附件三外,不在香港特別行政區實施」(基本法第18條)喎。

政府話,解決辦法好簡單,可以由中央根據基本法第20條,授權香港租西九畀內地嚟用。但係,第20條係話「香港特別行政區可享有全國人民代表大會常務委員會及中央人民政府授予的其他權利」。究竟呢啲字眼,係可以點樣解讀成「中央授予香港政府權利⋯⋯決定基本法有啲條文,有時適用,有時唔適用」?

根據政協陳永棋先生嘅高見,我一定係讀法律讀到癡癡地。因為,雖然有班愛國律師話高鐵合憲合法,但係我點睇都睇唔到以上所有係點樣合憲合法,除非佢哋講緊嘅「法」,係「釋法」個「法」,即係啲法律條文明明係寫嗰幾隻字,偏偏有人會睇到人哋睇唔到嘅字,好似國王先至見到嘅嗰件新衣一樣。

當然,唔少務實嘅香港人同覺得慳十幾分鐘好大分別嘅社會賢達就話:「其實大把民生事項緊要過高鐵啦,邊值得勞師動眾搞咁多嘢反高鐵?班泛民危言聳聽,唯恐天下不亂,拖慢香港經濟發展」,等等等等⋯⋯。

可能有更多人覺得,超,合唔合法有咩分別?高鐵唔畀錢都畀咗啦,講乜不嬲政府都無商量㗎啦,反高鐵有乜意思,真係反條鐵咩?

親,問題唔係在於起唔起條鐵。問題係,今日中央可以歪曲基本法第20條嚟繞過起高鐵嘅法律障礙,令香港人一踏入西九站範圍等於返咗大陸,喪失基本法嘅保障;聽日點解唔可以繞過埋其他基本法賦予香港政府嘅自主權同賦予市民嘅自由、權利?我哋指望邊個去守護香港擁有「高度自治」呢個基本法訂明嘅大原則?

好似你去茶記叫個西多,老闆求其俾兩塊白包你,你投訴呢個唔係西多喎,老闆串串貢話:「我話西多係咁嘅就係咁,你唔鐘意咪唔好食囉!但係你食唔食,都要埋單!」你哽得落嗎?

Sugar Square @ 法政巴絲

(原文載於2017年8月11日《蘋果日報》)