民建聯陳克勤早前接受無綫《新聞透視》訪問講述動物權益問題,但就惹起律政司長袁國強有無干預法官嘅疑雲,事緣陳克勤喺訪問中提到,有關虐待動物嘅案件過往判刑都好輕,佢就引述袁國強曾經同佢講,「喺一啲內部與法官嘅討論同交流中,佢都同法官講,留意吓呢啲虐待動物嘅案件係有一個普遍性情况,佢哋判刑時要考慮番趨勢同判刑起點係乜嘢」。

呢集《新聞透視》上周六播出後,法律界私下都有唔少討論。Emily前日問過律政司,究竟袁國強係咪真係有咁講,以及係咪向法官施壓,律政司發言人噚晚回覆,無回應袁國強有無講過陳克勤引述嘅言論,但話律政司一直重視動物權益,過去有就相關議題為律政司同事提供培訓,又話律政司不時舉辦有關刑事法律嘅研討活動,部分會邀請法官參與,曾就案件量刑原則等討論過。

發言人話,律政司長同律政司其他人唔會同法官私下討論個別案件或某類案件應該點處理,遑論干預判案或向法官施壓,表明「從不干預法院審判工作」。法政匯思發言人任建峰同Emily講,今次陳克勤幾乎陷袁國強於不義,但佢誤打誤撞令大家同時更關注動物權益同司法獨立嘅重要,都算「意外收穫」。

(原文載於2017年8月8日《明報》)