上星期DSE啱啱放榜,雖然冇狀元揀讀law,但我相信依然會有為數不少畢業生會選擇讀law嘅,咁就等我講下我入學時嘅期許同現實嘅差距啦。

我大概中四開始下定決心讀law,依加喺香港某間大學,一間會報警拘捕自己學生嘅大學讀緊LLB。我好記得我最初入大學最希望做到嘅,笨唔係普通嘅「大學五件事」咁普通,而係希望真係可以實踐到幾件事,讀咗若干年。就等我講下當初兩個FF嘅目標,喺現實中難唔難實踐,同埋檢視下直到目前為止有咩已經達到,有咩目標係未完成㗎啦,畀各位未來師弟妹諗下入大學前預先訂個目標畀自己(同時呻下自己讀U呢幾年嘅辛酸)啦!

目標一:大學入面每個faculty都識少少人

因為頭幾日返學我都係癡住哥哥,發覺佢行一轉campus係撞到唔少識嘅人,之後問先知佢每個faculty都起碼識兩三個人。咁我都同樣畀咗呢個目標自己。因為我自己本人都幾活躍喺campus唔同類型嘅活動,所以好早已經達成咗呢個目標。

千祈唔好睇少呢個目標,以為只係為咗喺campus瘋狂打招呼。如果你有一個朋友圈子係有晒10個faculties嘅同學,而且大家都擁有相似嘅理念,將來畢業之後如果keep到關係,可以為咗香港帶嚟一啲改變。所以我一路都好珍惜呢班朋友。

目標二:令多啲人關心社會時政

我入大學前已經知道其實唔係咁多人關心社會。因為大家嘅目標都係呢個揚名四海嘅「大學五件事──讀書、住hall、上莊、拍拖、兼職」,而好多人都會忽略,其實大學係一個畀你就唔同議題,上至天文、下至地理、死亡教育、民主係咪一個好制度,咩係公義、對香港未來嘅展望等等,都可以暢所欲言嘅地方。大家如果記得,6月30日「香港民族黨」同其他大專院校本定喺尖沙咀集會悼念嘅計劃,受警員同埋唔少「愛國愛港市民」重重阻撓,最終只能無奈搬去浸會大學繼續舉行集會。可能大家尚未意識到,不過借古鑑今,大學真係言論自由嘅最後堡壘,係變革嘅基地。

除咗呢樣實實在在嘅警方阻撓之外,因為依加香港各行各業,都同中國有好密切嘅生意來往,就算你想上街抗爭、遊行、甚至只係喺facebook share吓新聞,鬧吓政府或者中國嘅政權,你都會驚畀啲生意夥伴、中國企業客人發現而對你抱有懷疑啦,你就會對以上嘅行動有所保留,慢慢delete facebook啲字,放低黑衫黑褲……香港近年嘅自由已經慢慢收窄,你會發現港獨派/自決派/本土派,連基本嘅集會權利、參選權、成為代議士嘅自由逐漸失去。就算你本身冇咁鮮明嘅立場,你都會畀社會無形嘅枷鎖,令你少咗表達自己嘅想法。所以各位仲係讀緊大學嘅學生,請好好珍惜依加所擁有嘅自主、自由。

烚薯容 @ 法政巴絲

(原文載於2017年7月29日《蘋果日報》)