有人話,識得用,intern(暑期實習生)其實好好用。因為實習生一般都係收取一個比見習律師低好多倍嘅人工,而且因為佢哋想爭取見習律師合約,所以通常都會幾勤力同聽話。如果好彩,遇到個醒目、做得嘢嘅,咁真係好似多咗對手,話唔埋大家仲可以早啲收工𠻹。

咁如果唔好彩呢?大文豪托爾斯泰喺佢嘅名著《安娜·卡列寧娜》裏面有句名句:「幸福的家庭都是相似的,但不幸福嘅家庭有各自的不幸」(”Happy families are all alike; unhappy families are unhappy in their own ways.”)。呢句說話可以放諸律師行嘅實習生身上。好嘅實習生不外乎處事成熟、工作質素高、有效率等等;唔好嘅實習生就千奇百怪乜都有。

1. 你做埋我嗰份吖

有一啲律師行會將一啲年輕律師指派俾暑期實習生作為導師,等啲實習生工作上遇到困難時,都有人幫到佢哋。但係有啲實習生應該係當咗呢啲律師係佢哋嘅補習老師,可以「打電話問功課」,又或者阿爸阿媽。曾經有實習生,partner俾佢嘅每一份工作,佢都會第一步先去問啲junior律師答案係乜嘢,而唔係先做資料搜集,煩到個律師面都燶埋。其實,肯問問題可以係一個顯示自己好學嘅優點,一般律師亦都唔介意教實習生。但係,無論做任何事,最低限度都應該盡咗力嘗試先,真係有解決唔到嘅問題先再請人幫手,無理由要個律師做埋你嗰份㗎,係咪?

2. 自己永遠優先

而家大部分律師行都有「門常開」政策(open door policy),無論律師定合夥人通常唔會關門,等個工作氣氛無咁拘謹,同埋鼓勵同事互相溝通。咁如果有人關咗門,大家都會意會到佢係忙緊,唔想有人打擾佢,譬如佢需要好專注咁處理一啲複雜嘅工作,或者同客人傾電話。有啲實習生,就算見到咁嘅情況,都唔理好醜照衝入去,甚至見到個律師/合夥人全神貫注做緊一啲嘢,都唔識趣應該揀一個好啲嘅時間先至搵佢哋。咁樣究竟係無禮貌定無常識呢?我睇唔透。其實,要解決呢個問題好簡單,可以首先寫個簡短電郵約個時間先,咁就可以留個好啲嘅印象喇。

3. 唔知「訂」

有啲實習生,明明喺本地學校讀書但係好鍾意開口埋口都chok啲ABC/British accent(但係發音錯誤)。其實我唔明用美式口音(或者英式)點解可以顯示自己高人一等,只能夠講一句「做咩姐你」。又有啲鍾意著/戴晒周身名牌(試過有人同合夥人撞袋),或者有意無意間透露自己同邊個名人係世交等等。呢啲實習生我會直接無視,反正佢都唔憂做。至少喺我眼中,律師仍然係一個好講meritocracy嘅行業,整色整水嗰啲不如去選港姐或者做補習天王算啦。

Sugar Square @ 法政巴絲

(原文載於2017年7月8日《蘋果日報》)