喺我打緊呢份稿嘅時候,我已經喺灣仔會展外塞咗大半個鐘巴士喇。望住警察架起嗰啲高過我嘅水馬(乜原來水馬有咁高嘅,真係開眼界),沿路仲有好多紅底黃字嘅橫額,同埋大大舊夠晒同祖國接軌嘅燈飾,迎接習總同習夫人訪港。咁大排場,果然係國家領導,市民要讓路,真係令我好想同習總大大聲講hihi!

又唔知大家近排有無喺Whatsapp收到有關一份超級筍工嘅招聘廣告:咩都唔洗做,齋坐全日就收一千,包飲包食,仲可以工作時玩手機?真係差啲心郁想報名。雖然李慧琼同葛珮帆議員已經即刻衝出嚟話「齋坐遊行」係泛民捏造,而且我都好想信佢哋。問題係,講到呢到,我腦海中浮現出親中「收工男」示威完畢後大叫「收工!」嘅畫面⋯⋯

除咗親中派動用雄厚財力,政府都好識用軟性宣傳培養大家對回歸祖國嘅感情。大家睇咗咁多年「心繫家國」,應該都留意到依排就多咗段「珍惜我的香港~」。搵群星唱好回歸,首歌個feel同當年「福佳始終有你」有異曲同工之妙。仲有回歸宣傳片,內容強調香港人以往一同經歷患難,將來一同迎接新機遇。

不過唔知點解,明明宣傳片嘅內容好似好正面,但係我睇完就有種比人「坤__咗」嘅感覺。宣傳片播返當年沙士嘅片段,但係就好似選擇性失憶咁,完全無講沙士係首先係內地隱瞞疫情,繼而由內地傳入香港(!)短片更加無顯示到沙士之後,香港只係陷入越來越深嘅困境:逐漸收窄嘅自由、慢慢崩壞嘅法治,仲有如雨後春筍嘅親中政治團體,同埋一眾因利益而為政府護航嘅「社會賢達」,簡直群魔亂舞。

回歸以嚟,各種政府力推嘅政策,都係「坤你入局」:國民教育、23條立法、嚴重超支嘅高鐵、嚴重超支嘅港珠澳,仲有有份令香港信用評級下降嘅一帶一路。表面係為咗香港嘅繁榮穩定,實際上係要香港同化成just another city in China。50年不變、堅守一國兩制,係最大嘅大話。

呢個,先係回歸粉飾太平令人嬲嬲豬嘅原因。香港正在沈淪,呢個慶典唔係為香港人而設,而係為當權者而設。

親中派有錢買人頭去回歸遊行,我哋都有一雙腳。如果你都珍惜我哋嘅香港,請你今日一齊行出嚟,拆穿呢個歌舞昇平嘅假象。

法律界小市民

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

 

原文載於2017年7月1日《蘋果日報