又係一個喺律師樓做到半夜嘅星期五夜晚。又係一個地鐵已收工,然後喺中環想番屋企嘅夜晚。

第一時間打開Uber個App,噢!成個中環都無車?咩事?係喎,警察又啱啱超高調咁,拉咗一班Uber嘅司機,真係殺一儆百,威晒。

頂,求神拜佛,希望五架的士內,可以搵到一架唔拒載嘅的士,肯唔好太黑面咁車我番屋企。終於,第七架車上到(本來第六架都可以,但係我去土瓜灣無理由行西隧呀⋯⋯)。

係的士上,我諗返今晚做到咁夜嘅原因,就係因為老闆話要攪Paperless Office。Paperless? 律師樓喎?你以為係天方夜譚?Sorry,其實幾年前法庭已經攪過e-submission,用電子方式將打官司嘅陳詞呀案例呀呈堂,真係唔知救咗幾多棵樹。不過亦唔知點解呢啲德政,推咗幾年就不了了之,或者我哋各個政府部門對電腦科技嘅抗拒程度,已經去到要將啲手提電腦隨便放等人偷嘅地步,咁仲點會想攪好呢啲高科技嘢唧。你睇下個新嘅電子法例網頁,難用到要開班教人用先用到就知啦!

老闆其實真係洞悉先機,因為長遠嚟講,肯用幾萬蚊請個秘書打信寄信Fax信嘅律師樓,只會越來越少,如果不思進取,只係攞住幾十年前嘅技術去搵食,咁樣畀社會淘汰就只係遲早嘅事。就正如你只懂得揸的士,而又認為揸的士就是你的全部,到有朝一日的士被淘汰,你就會跟著被淘汰。

有人講過,近十年的所謂全球化、互聯網,以至最新嘅人工智能,係社會嘅大方向,但無一樣係學校可以教到嘅!所以要生存,就要不停去適應,去接受新事物,咁社會先會進步。

我真係唔明,連我哋偉大嘅祖國都有嘅Uber或的的出行或首約汽車等呢啲Call車Apps,點解香港反而唔批准用?如果係因為受制於一啲已經過時嘅法例,咁點解唔係改變法例,而係迫人生活喺過時嘅法例?

最好笑係,即使在政治層面上,批准Uber營運比唔批准佢營運,點都會有著數,因為我相信即時可以提高市民對政府嘅支持度,而且亦可以立刻提高的士司機的質素(特首最近咁鐘意上面書做議員嘅Stalker,佢無理由睇唔到啲講的士服務有幾差嘅Post)。好可惜,我哋嘅政府就係唔想配合時代嘅轉變而接受新事物。

無嘅,自從幾年前嗰個用iPad嘅特首,到家嗰個仲係proud of會用一張紙一支筆嘅特首,以至下一個唔識用八達通出閘,然後賴個出閘機嘅特首,或者都可以睇到我哋政府嘅適應能力,或者對科技發展嘅重視程度有幾低啦。

好,發完牢騷,終於返到屋企,見到加咗價嘅車資同例必唔找嘅毫子,我真心希望我哋個政府唔好再拉住社會進步嘅步伐,move on with us.

荒唐鏡 @ 法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

(原文載於2017年6月3日《蘋果日報》)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s