「现附上昨天会议的会议记录初稿,请审阅。」我一睇,原來係「叫我浮云」,即個客嗰邊個陳秘書喺微信「Project X工作小组」群組中發嘅訊息。我睇到反晒白眼,因為用喺微信同WhatsApp呢類通訊軟件溝通,對我同我間行嚟講,好麻煩。

我間行唔鼓勵喺呢類通訊軟件講機密嘢同畀法律意見,主要原因係保安冇保障;第二係呢類通訊軟件同間行本身嘅資料庫唔接軌,結果係,為咗保存完整嘅檔案,我要將喺微信收發嘅資料用自己嘅方法,射返去間行嘅系統度,增加咗好多無謂嘅行政工作。

另外,通常啲法律意見同文件都比較長,中間又可能有來回修訂,用通訊軟件反而唔方便,搞搞下一時疏忽(俗稱戇_),畀人知道埋邊個有咩意見,分分鐘要對份工「不留戀」;如果係圖或者文件但.jpg仲慘,唔知點解通常一定鬆郁矇兼次序混亂,要睇清楚仲難過叫CY認錯。

另一個問題,係我真係唔知邊個打邊個。大佬呀,一開波我點知「叫我浮云」就係陳秘書、「浪漫的总理」就係李主任、「金融兔兔」就係小張呀?睇樣?唔好玩啦,「叫我浮云」好似范冰冰、「浪漫的总理」直情同習大大一樣樣、而「金融兔兔」真係一隻小白兔!老老竇竇,我就真係冇見過呢幾個頭像,以任何形式喺我或我個客寫字樓出現過。

最大嘅挑戰,都係怕一時手快,搞亂群組。我間行都好啲,每個律師都派個手機做公務,正常嚟講私人嘢同公司嘢分開手機處理,少啲機會搞亂。但我知道,有啲行會要求員工用自己手機做公務,咁就麻煩啲……原本諗住同朋友呻下「OT2周,身心都損」,一個唔覺意發錯咗畀老闆,到時講幾多次「Sorry send錯」都冇用。

可能你會話:「唓,咁你唔好用嗰啲軟件、唔好加入嗰啲群組、唔好add個客做微信網友囉!」問題係,有啲客,雖然高高在上,但同某個強國一樣,喺強硬嘅外表下面,埋藏住一顆玻璃心,所以如果你唔add,差不多就「別無選擇,必須辭職」。

個客同老闆點解又唔怕喺公開群組或公眾場合講錯嘢?因為,第一、佢哋都唔覺得有錯;第二,你話佢錯,佢大可以話畀人移花接木,係你班友自己崩口人忌崩口碗;再唔係,學梁政協副主席咁,告你誹謗,即使告唔入都煩下你丫嘛。

呻完。我而家去覆阿范冰冰,呀唔係係陳秘書先。

Derrica C. @ 法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

(原文載於2017年5月27日《蘋果日報》)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s