早兩日,我同一班同事茶餘飯後講起點樣界定一個人係偽君子定係真小人。

我係咁睇嘅:真小人,即係唔怕話畀所有人聽,佢係一個衰人,亦都唔怕畀人鬧,甚至享受畀人鬧。呢一種人係從來唔會扮好人。偽君子就唔同,識得計算同利用人,佢跣你一鑊都可以講成係為你好或者為大局着想,可能你仲畀佢氹到暈陀陀添。

同事A話唔係喎,偽君子其實有好多種,有啲係唔會扮好人,但係會扮上等(或者應該話”posh”),用一個高級嘅外殼包裝自己。例如成日強調自己係咩名牌大學畢業,或者出身背景有幾好,有幾多家底等等。咁樣已經足夠impress好多人,於是佢哋講幾多廢話都會有人追住嚟聽,尤其係當香港咁多只睇表面嘅人。

大家一致認為,喺職場上或者朋友間遇到道貌岸然、笑裡藏刀嘅偽君子,比起可以防範嘅真小人更加恐怖。

同事B話仲有一種人,係好難去界定佢係一個真小人定偽君子嘅,因為佢嘅行為已經係進入咗化境,通常呢啲人都係啲部門主管,鍾意「一隻手指捽死你」,強項係搬龍門,「公就我贏,字就你輸」,同埋玩辦公室政治,繼而覺得自己可以呼風喚雨巧威威。

真係世事都畀同事B看透了,因為而家社會上好多位高權重嘅人,都係咁樣樣。佢哋可以喺政府同社會各界裏面身兼要職,做影響市民大眾嘅決定,但係絕少要為自己嘅言論同行為負責。佢哋比一般嘅偽君子同真小人都恐怖,因為佢哋擁有嘅權力,已經令佢哋可以肆無忌憚咁歪曲事實。佢哋嘅行為反映佢認為自己係可以凌駕喺其他人之上,「特事特辦」有如食生菜(就好似故宮事件、機場行李事件等等),總之其他人要守嘅法規,佢都唔需要。最慘係無權無勢嘅大眾,只能任由宰割,任人魚肉。

咁可以點呢?特首又無普選,我哋又控制唔到邊個獲欽點為高官。唔通日日都係喺FB抽下水就當盡咗公民責任?

都係㗎。所以有可以發揮你嘅影響力嘅機會時,就應該要把握。有得投票就更加要投,唔好覺得少我一個唔少呀。

Sugar Square@法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

(原文載於2017年5月13日《蘋果日報》)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s