大家是否還記得,小時候最不喜歡媽媽說甚麼?其中一樣想必是:「你睇隔離班珠女,人哋讀書又叻、游水又攞獎牌、彈琴又八級、仲要好乖。點解你唔可以學吓人哋?」你已盡了力,覺得很洩氣。

到升中後,大個女,你拍拖了。年紀輕輕的你未掌握同男友的相處之道,又自恃手上大把「兵」,經常忍不住發脾氣:「你睇Rachel個男朋友家聰,又高大又靚仔,屋企又有錢,又有外國名牌大學預收,打籃球時型過余文樂,最重要係人哋對女朋友超好囉!上年聖誕佢送咗隻親手做嘅bear bear熊畀Rachel呀!今年情人節,佢仲專登學結他,自彈自唱Yellow畀佢聽呀!點解你唔可以對我好啲?」男友最初也忍氣吞聲,後來終於受不了,下堂求去了,臨走前還拋下一句:「你咁鍾意家聰,你咪搵佢做你男朋友囉!靚唔係大晒㗎!小姐你收吓啲臭脾氣啦!」你呆了,沒想過初戀就這樣結束。

慢慢地,你學懂了,有些氣話不能輕易說出口。如果事事跟別人比較,身邊的人不開心,自己也容易不滿,何苦呢?反正每個人都有優點缺點,自己也不是完美,如果不想吵架甚至分手,就包容一點,只著眼對方的優點好了。如果真的看不過眼,想對方改的話,也是用正面的說話技巧來鼓勵比較奏效。例如千萬別埋怨:「你睇John成日同老婆去睇戲,但你成日唔陪我!」要講:「我見影評讚《沉默》好睇喎,不如今晚去睇吖!」更唔好話:「隔離屋胡生請咗兩個印傭服侍胡太,但你從來都唔幫手做家務!」應該話:「老公唔該晒你倒咗垃圾呀,我仲要洗碗,如果你可以收埋衫就好喇!」人總是在錯誤中成長。

工作上,雖然合夥人經常領你的功勞,然後有「鑊」就推卸給你,但你以為只要不「駁嘴」,聽聽話話盡心做,老闆心底裡其實是欣賞的。誰知某次團隊吃中午飯,在茶樓遇上某單案子的對家,合夥人竟然當著你面讚對家:「Eva你上次份Statement of Claim(申索陳述書)好得喎!搞到我哋draft份Defence(抗辯書)頭都痕晒。有無興趣過嚟幫我手呀?」

那一刻,你心灰了。心想反正自己個客的所謂抗辯根本就無甚理據,之前的點子已經讓你絞盡腦汁,做得很沒趣。你問自己為甚麼生活需要這麼多妥協,你搞不清自己是成熟了還是虛偽了,心中掙扎是否該辭職,跟這個皮笑肉不笑的合夥人一刀兩斷……

Belle Woods @ 法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

 

原文載於2017年3月18日《蘋果日報