一年之計在於春,早幾日見到某風水大師喺大台教大家雞年行運貼士,等我又分享下新一年點樣趨吉避凶嘅私人心得。希望幫到大家,來年步步高陞、路路亨通!

首先,衣著方面,大師話今年旺金同火,大家要留意返自己出生嘅月份,嚟match返啲衫嘅顏色。不過,fat唇呢啲嘢,一般人都係識條鐵,淨係聽大師解釋係唔夠嘅,梗係要向玩開時裝嘅名人學習吓。例如葉劉baby咁,上下身襯晒色就perfect池啦,最好就係可以提升個人自信心,隨時露兩手,呀唔係,露兩腿都無問題。

古語有云:病從口入,禍從口出,食入口同講出口嘅嘢都唔可以大意。食方面,新年要甜甜蜜蜜吖嘛,盡量唔好食咁多酸嘢,葡萄嗰啲可免則免喇。同樣,新年流流,相嗌唔好口,就算喺街撞正你個死敵,都記得要保持笑容,祝佢身體健康、青春常駐,最多記得帶定多包紙巾用來吐佢口水。

講完衣同食,就梗係要講埋住同行。住嚟講,當然係地方闊落對風水好啲,瞓棺材房呢啲就唔太老黎。新年要行大運,除咗年宵之外,內地都係一個行大運嘅好去處,因為中國係一個文明法治嘅地方,尤其係對於大家呢啲愛黨愛國嘅人士,而家已經唔再需要考慮用自己方法定其他方法好,最緊要大家自己願意,國家就會派人嚟接走你㗎喇。咁好待遇去邊度搵?

最後,做人嘅嘢唔係無求就可以膽大嘅,凡事都係小心為上,唔係話知你有八個保鑣都保你唔住。呢方面,拜求神靈保佑就係一定要嘅。如果大家唔鍾意學林鄭去林村抛寶碟,學鼎哥去大圍搵車公都得。就算係教徒都無問題㗎,上帝唔會咁小器嘅,你來年受感召嗰陣記得比返credit上帝就得㗎喇。不過記住記住,拜神嗰陣千祈千祈要企返喺安全嘅位置,唔係比麒麟撞到會衰三年,到時賴解籤師傅都幫你唔到呀。

孫普珍 @ 法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

 

原文載於2017年2月4日《蘋果日報