2017 年第一次同大家見面,首先祝各位絲打新年快樂!

新年係唔少律師行公佈升職消息嘅日子,謹此恭喜如願以償有職升嘅朋友!

我同房打得又睇得嘅 G 亦剛剛從律師(Associate)升職成為顧問律師(Counsel), 但佢塊面黑過某架和諧號,點解?「車,又冇人工加,但啲客同老闆對我要求又高咗,冇 so 呀!」我:「但升 Counsel 代表你就快可以升合夥人(Partner),到時咪可以搵多啲囉!」「唉,問題係我唔想升 Partner 呀,我想專心做法律工作,唔想 R 生意同做行政同管理!」仲有一樣:「我打算呢兩年生 BB,但如果要升 Partner,就要去美國總行做一年,點生呀?」

我問:「咁老闆點講?」「佢覺得我係廢青啲 friend,冇上進心囉。其實每個人追求嘅嘢都唔同,佢追求事業多啲,我追求家庭多啲,冇話廢唔廢架喎!我已經決定,佢再逼我升職,我就轉工!餓唔死嘅!」我好慶幸 G 清楚知道自己生活嘅重點,同時以行動循呢個方向進發。

不過,身邊有更多朋友冇 G 咁有智慧,日呻夜呻,但又唔做啲嘢改變現狀,真係好矛盾。

朋友靚太 N 喺另一間律師行做 Counsel,佢話,佢啲女同事,特別係剛攞牌或剛升職、個心好紅同單身果批,叫極都唔肯收工,根本冇機會識到人、拍到拖,搞到佢個心好唔舒服。我話:「可能人哋想升職多過想拍拖呢!」N 話:「係就梗係冇問題啦,但唔係囉!佢哋成日問我點識男仔,又呻冇拖拍,但行動上一啲都唔配合!佢哋唔改變自己,例如執執個樣、減少工作時間、擴闊生活圈子,生活又點會有改變呢?個天又會無啦啦跌個白馬王子落嚟啦!當然緣份唔可以強求,但唔代表你完全唔去求!」

一語中的。我相信,唔少人都好似 N 口中啲女同事咁,講就話要 A,行動就做 B,咁搞法,鼎爺都幫你唔到。新嘅一年,名位絲打又係時候思考吓,究竟你生命中有咩元素(如家庭、事業、信仰……),呢啲元素各自嘅比重有幾多,而你又可以做啲咩去實現你追求嘅平衡。唔一定要好似 G 咁激要轉工嘅,譬如話,如果你覺得法治同環保喺你生命中有絲絲嘅重要性,咁你可以考慮撥點點嘅時間、資源同努力去支持呢件事,可以係捐一百幾十畀守護公義基金、可以係(叫人)咪_丟垃圾,悉隨尊便。

最後,祝大家喺 2017,要(唔)升職就可以(唔)升職、要 B 有 B、要拍拖有拖拍、要__有__!(請自行填上)

Stephanie Matias @ 法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2017年1月7日《蘋果日報