我曾經光顧過銅鑼灣書店,唔知嗰啲算唔算係禁書。書店五人相繼「被」失蹤,我太太從此無晒安全感,一日五個追魂call。

我經常loop河國榮嘅「亞視永恆」,以為亞記真係永恆,執笠嘅係我。點知愚人節當晚,我十年來第一次轉台睇亞記,佢竟然連「魚樂無窮」都冇,踏正11點59分「噗」一聲,畫面突然變藍,59年歴史就咁玩完。

行李包事件,有人否認講過「叫我梁特首」。不過,我間律師樓就真係有律師糾正過同事,話「叫我合夥人」,係「我爸是李剛」嘅香港律師樓版本。

六月英國脫歐公投後,英磅大插水,英國老闆塊面從此未「和諧」過。

Pokemon GO大行其道,一放lunch就去遮打花園捉精靈,整整兩個月元神出竅。

女神結婚了!新郎不是我,是馮德倫。

立法會選舉,有人自認係「法律界桂綸鎂」,仲話人地讚佢似袁詠儀、梁詠琪。講到咁,我都忍唔住偷望過。咁老老實實,點都順眼過RIP,不過人蠢冇藥醫,講完。

彭定康訪港,我就申請BNO。我係有掛住肥彭,但並冇戀英,申請BNO純粹因爲要去玻利維亞旅遊。我個女問我呢本係乜嚟,屋企兩老亦話佢地都冇,我先發現原來只有我呢一代人先有本咁騎呢嘅護照。講真,印刷精美,做個紀念都好。

立法會議員「被」DQ。又見到個「被」字,不勝唏噓。

女神結婚了!新郎不是我,是強強。

Last Christmas I gave you my heart
But the very next day, you gave it away
This year, to save me from tears
I’ll give it to someone special

希望在人間,祝大家2017年進步。

(撰文:孫公公@法政匯思)(圖片來源:蘋果日報)

所有博客及專欄文章只代表作者本人意見,並不代表本報立場。

(原文載於 2016 年 12 月 30 日《852郵報》)