「陳生,唔好意思呀,由於我哋多位合夥人同律師都放假,而你要求嘅工作非常趕同複雜,爲咗你嘅最佳利益,我哋律師樓今次恐怕唔可以爲你服務喇。」

我老闆話齋:「律師都係人,人係要放假嘅!」所以佢會放成個月大假,飛返老家澳洲過聖誕。而根據專業守則,我哋事務律師只可以喺確知自己有足夠能力嘅情況下,先可以接工作,所以喺律師樓幾乎真空嘅呢段期間,我哋可能會有生意都唔做,推咗啲客。

事務律師嘅專業守則列明,所謂「能力」不單包括對有關法律原則嘅了解,仲包括對應用相關原則同程序嘅認識,以及有足夠嘅時間去處理有關事務。我聽講過,有個事務律師平日做開樓宇買賣,完全未做過亦唔識訴訟事務,有次唔知點解走去幫人做民事訴訟,結果搞到一鑊泡,上庭嗰陣畀個官鬧到面懵懵都不特止,佢個客好似都有損失,後來個客打算去律師會投訴佢專業失德,之後點我就唔知喇。

事實上,唔講專業守則吖,律師都係人,都有基本嘅責任感、誠信及同理心,如果應承咗個客幫佢,結果又因為冇心冇人冇能力冇時間而做得唔好,累咗個客,又點過到自己嗰關呢?所以我都唔係好明,有人明知(唔係唔知吓話)自己唔得掂,做得唔好會累咗千萬莘莘學子,點解都仲好意思做局長同講風涼話?有人擺明漠視香港人嘅憂慮、開到口撐831決定同要為廿三條立法,曾經因為跟錯發叔隊擦唔到阿爺鞋而哽咽,試過「誤導」記者,又開口埋口得罪人,點解仲好意思打算參選特首?佢哋係咪真係心安理得?

其實我唔明嘅仲有:大家都係人,點解朱經緯懷疑以警棍毆打途人事隔兩年多仍未被檢控、梁天琦懷疑同人打交就幾個月即落案起訴、一個手無寸鐵嘅婦人懷疑以紙皮箱阻街就被上手銬圍捕同即時票控?大家都係人,點解我老闆就可以高高興興回家團年,但多名內地維權律師自今年7月或之前被捕之後就要被羈押甚至受暴力對待?大家都係人,點解大部份香港市民就可以平平安安溫溫暖暖咁過平安夜食聖誕大餐,部份香港人同世界唔同地方嘅人就要受飢寒嘅煎熬?

今日係平安夜,講呢啲嘢可能你會覺得掃興,不過,正正係因為今日係平安夜,我哋先更需要以感恩同謙卑嘅心,謹記地球上所有人都一樣享有平安、自由、生命安全、法治等與生俱來嘅權利,亦有著以兄弟鄰人般互相對待嘅義務。畢竟,我哋每一個,都先係一個人,之後先係一個律師/政客/警察/食客/遊客等,不論我們正扮演咩角色,都應該同可以為我哋嘅 fellow human beings 出一分力。

最後,祝願大家都有個身心平安嘅平安夜同聖誕新年假期!

Derrica C.@法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2016年12月24日《蘋果日報