又到聖誕又到聖誕!又到一眾痴男怨女為買什麼聖誕禮物給另一半而傷腦筋的時候。

相約一班大學宿舍朋友星期五晚打邊爐,大家興高采烈的烚肥牛、碌蝦丸,八卦互相的聖誕大計。

霍爺:「肥仔恩你點呀?聽講阿嫂話想去芬蘭睇北極光喎!」

肥仔恩:「唉,講起就煩喇!佢淨係得個講字,又唔想跟旅行團,但又唔去搵資料做準備。你知我呢排做到嘔電,放工仲要諗行程訂酒店租車,忙到我一頭煙呀!佢仲話一定要住什麼玻璃冰屋酒店,大佬呀,六千幾蚊一晚呀!佢當我印銀紙咁。」

金槍強:「嘩⋯真係好甘喎。不過我女友都話要條乜鬼手鏈,加加埋埋都成皮呀。我仲要交碩士學費呢,希望出年bonus多少少啦。」

文俊:「我諗我算好彩,老婆話唔使咁奢侈咁豪華,想同我做啲有意義嘅嘢。佢安排咗我哋去柬埔寨一個星期,去探啲孤兒,同佢哋玩遊戲,順便睇吓吳哥窟。」

大頭明:「我冇乜特別節目呀,都係飲飲食食,打吓牌唱吓K打吓機咁啦,同陪吓阿媽飲茶囉,反正今年個假咁長。」

當然大家未必是基督徒,但大家都會聽過耶穌降生的故事。他誕生在一個馬槽裏,是不能再卑微的地方。他教導我們的是要愛主愛人。而愛人就是要關心其他人,與較不幸的人分享自己所擁有的。

在假日與家人朋友團聚固然是分享愛的一種方式,而大家平時工作壓力大亦需要好好休息平衡心理。但很老土的說,在狂歡的時候,別忘記社會上有很多有需要的人,大家可以付出一些時間或金錢,為他們帶來溫暖。

除了分享美好的事,耶穌亦以身作則,對不公義的事情加以斥責。2016年香港發生了很多事,尤其不公義的事情日益普遍。然而從立法會選舉和特首選委會選舉的結果所見,香港人非常想求變。

展望2017年,小圈子會選出新的特首。現時有可能參選的人馬有不少都是基督徒,希望他們都能以前車為鑑別好大喜功,效法耶穌的謙卑,用心的聆聽民意,更可以堅守一國兩制,保護香港的三權分立和司法獨立。

Belle Woods@法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2016年12月17日《蘋果日報