朋友G啱啱同拍拖多年嘅男朋友分手,作為好姊妹嘅我,本來都好擔心佢係咪handle到,估唔到G個樣容光煥發,仲精神過之前。我問佢點解,佢話:「女人一定要學識靠自己!雖然分手係好hurt,但係我嘅快樂係我自己爭取嘅,唔係依賴男人比我嘅。」見到佢咁獨立同堅強,我都好佩服。

但係,當然唔係個個女人識咁諗,更加唔係個個做得到。好似我另一個死黨D,就同個理論上分咗手成年嘅ex糾纏不清。今日,D就約咗我出嚟傾心事,因為,佢個ex又想同返佢一齊……

「其實,」我弱弱地問,「佢都唔止一次偷食之後搵返妳,妳點解仲畀機會佢呢?」

D話:「我都嬲佢㗎…..但係佢都有對我好嘅時候嘅,佢都記得我生日㗎……人誰無過呢,無人係完美嘅……」

問題係,D個ex真係有舖偷食癮,仲扮到成個好男人咁,如果唔係一次D發現佢個ex嘅手機裡面有同唔止一個女仔嘅肉麻短信,D都唔會知道真相。就好似有啲特首選委參選人,話就話唔披露自己支持邊個做特首,但係喺重要關頭實出來撐阿爺欽點嗰個。最無恥嘅係,當D發現咗之後,佢個ex仲話:「我記憶中我無講過,會淨係同妳一個一齊!」

D似乎知道我諗緊乜,於是佢繼續講:「Sugar,我唔係妳呀,我老啦,5年青春都花咗係佢身上。我無得揀呀!」

「妳好似大我幾個月咋喎……妳講得啱,無人係完美,但係妳明知道呢個人係一個無恥嘅大話精。如果妳繼續呃自己佢係一個好人,咁妳浪費嘅就唔係5年青春,而係妳嘅將來!」

我相信,D其實自己都知,只係需要一個聲音提醒佢。

「呢個世界咁大,點解唔畀個機會自己?只要妳肯揀,就有得揀。好似嗰個廣告咁講,妳值得擁有吖嘛!」

如果你係D,你會點揀?未來5年,香港人值得擁有一個真正急市民之所急,唔係阿爺隻狗嘅特首。今個星期日,記得為你嘅未來5年投一票。

Sugar Square @ 法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2016年12月10日《蘋果日報