絲打 Cissy 上個月被求婚後,問我:「Stephanie,可以做我嘅婚姻監禮人嗎?」我瘋狂恭喜佢之後,弱弱的答:「咁樣樣,你要等多幾年喎……」

雖然根據《婚姻條例》,事務律師可以成為婚姻監禮人,但唔係個個律師都可以監禮。事務律師要有最少7年作為律師嘅工作經驗、持有現行執業證書、3年冇被專業團體作出紀律行動、完成指定嘅訓練,仲要經婚姻登記官委任,先可以正式成為婚姻監禮人㗎。

除咗以上條件外,我聽過唔少新人對婚姻監禮人有其他要求,例如要有肉地、有福相、有笑容、要識搞氣氛等。但我覺得,有時候可能會過猶不及囉。

有一次我同朋友X去觀禮,當時嘅婚姻監禮人A律師,完成咗一般嘅程序後,拎住支咪講咗成幾分鐘嘢,向新人訓示相處之道,又疑似嘗試講棟篤笑,影相時叉腰插袋3/7面,仲chok過對新人搶哂鏡咁……新人事後同我講,佢哋之前去ABC
律師樓,打算隨便搵個律師監禮,但長輩話要搵個識搞氣氛嘅,結果大家都覺得A律師有啲過火。

未完喎,當時就嚟結婚、都係搵咗ABC律師樓、但冇指名邊個做婚姻監禮人嘅X,見到咁嘅情況,嗱嗱聲打去ABC律師樓,問吓係咪A律師幫佢監禮,律師樓當時答唔係,X於是放下心頭大石。點知到佢結婚果日,出現幫佢監禮嘅,竟然係A律師!而且比上一次講嘢更多,個樣更chok!後來X向律師樓了解,原來當時接電話嗰個人,誤以為X好想A律師幫佢,於是同A律師講咗,A律師覺得有人賞識好開心,於是自告奮勇幫X監禮,亦私人醒加多幾錢肉緊,幫佢搞氣氛。

「咁我唔搵ABC律師樓喇!」Cissy 話。「我要合法結到婚就得,監禮人恰如其分就ok。」係囉,婚姻監禮人搞氣氛過咗火,新人最多(失)笑吓,但公職人員如選舉主任、立法會秘書同立法會主席過咗火,就分分鐘係越權,不但可能影響當事人嘅政治權利;而如果立法會人員受行政機關影響而刻意越權,更可能損害香港嘅三權分立、民主同法治,絕對不能容忍!

Cissy 又問:「唔做婚姻監禮人,咁做我伴娘啦!」我又弱弱的答:「唔……如果你唔怕兩件喜事相沖的話,我當然樂意啦!」佢擘大對眼望住我。「我都剛剛訂咗婚呀!」我說。

(音樂。完。)

Stephanie Matias @ 法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2016年10月29日《蘋果日報