「放工啦,今晚約朋友去食好嘢先!」

我呢個同事Annie,30幾歲人都成個大細佬咁,成日都咁high咁開心嘅。初初識佢覺得佢怪怪地,我心諗:「仲食好嘢,唔係食好西咩?哈哈!」。慢慢發現同佢溝通真係有啲困難,大家好似時空交錯咗咁,好多社會大事佢都完全唔知。我後來知道佢最憎睇新聞時事,又唔睇報紙,屋企沒有高清電視,只有TVB。我心諗,我尊重每個人嘅個人選擇,但估唔到真係識到啲咁嘅人喎!佢話啲議員成日嘈又拉布好無聊,既然啲新聞又煩又唔關自己事,有工開,又住到公屋咪得囉!我諗起自己,每日係咁look手機,睇到嘅都係日日新鮮日日甘嘅新聞,係呀,資訊多到睇唔晒,咁又點吖?日日都唔知激爆咗幾多次,於是,我都會諗,如果我都hea,唔理咁多,頂多同人溝通怪啲啫,但係咪都可以開心啲呢?

某日,Annie好嬲咁話,「噚日去屋企附近街市買餸,唔知搞咩啲檔口唔做生意,仲貼晒標語大字寫上領展無良,迫走小商戶等,喺度搞事,搞到我冇餸買,阻住晒!」。我諗起佢應該無睇新聞,我就正經起上來咁話,「自從領展上市後,要向股東負責,街市的外判承辦商決定要番新,之後用市場水平釐定租金,咁高嘅成本又有幾多小商戶頂得住吖?小商戶就嚟被迫結業,試過各種溝通渠道都唔成功後,無奈才會罷市抗議啫。」「吓,咁番新後嘅商戶咪要加價?我哋公屋居民嘅負擔能力又點同有錢人呀?如果唔係公屋啲租就唔洗平啲啦!邊Q個畀佢上市㗎?乜無人嘈過咩?」我話:「之前議員同小商戶都有嘈嘅,但畀唔到足夠壓力去改變政府或大集團嘅決定囉。其實我哋係咪應該體諒下啲小商戶呢?當初大家都以為領展上市唔上市影響唔到自己,就冇理,仲話啲議員成日嘈,到而家燒到自己了,就去怪責嗰啲只係想爭取番自己權益、亦同樣係受害人嘅小商戶。我哋係咪應該反問自己點解當初唔去支持下幫我哋成日嘈嘅議員呀?」Annie話,「我要掛住搵食嘛,邊度得閒理咁多啫!」說罷轉身走了。

最近,我哋公司管理層話公司要向股東負責,會裁員來節省成本,不幸哋Annie也被選中了。樂觀的Annie話,「正呀,我估計我喺公司服務咗十年,份賠償一定唔錯,一次過收錢仲好啦!」。到最後一日,我哋lunch一齊farewell佢,Annie突然喊咁口。我話,「唔好擔心啦,你一定好快搵到工嘅!」佢話,「我唔係擔心搵工呀,而係我份強積金呀!公司真係賠了一筆錢畀我,但係原來全部喺我份強積金度扣番晒啦!咁同自己畀錢自己有咩分別啫?強積金唔係畀打工仔第時退休用嘅咩?僱主有乜理由可以炒我仲攞埋我啲退休金㗎?有無攪錯呀!」另一同事話,「其實呢個問題議員都有同政府嘈過,唔係特首同林鄭又點出嚟交代話佢哋做緊野吖!不過肯肯定唔夠嘈啦,咪拖吓拖吓囉!」Annie話,「媽呀,我等唔切啦,我都要嘈呀!」。

我發現我都係唔hea得,真係要做好自己的「生涯規劃」,唔做豬!

Scotia Sze @ 法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2016年10月22日《蘋果日報