前排無意中讀到一篇叫瑪莉啞然失笑嘅文章,所以忍唔住要出山講返兩句(實情係太忙冇時間同大家吹水啫)。篇文係一位因為女朋友而知名度頗高嘅新晉大律師寫嘅,內容簡單嚟講就係作者認為依家行業分工太細,好多人除咗自己專業之外乜都唔識,於是「讀法律的,別問我經濟。讀醫的,別問我文學。讀經濟的,對法律一竅不通」,多愁善感嘅年輕大律師不但為此而感覺悲哀,仲話咁樣係「比香港青年熱衷本土可怕十倍」添!

其實唔使拋書包大家都明,專業呢味嘢,簡單講就係因為知識技能越嚟越複雜,專攻一瓣大家容易啲搵食啫,同阿嬤個年代「學返門手藝」冇咩分別。不過呢,近十幾二十年嚟,大家睇到過度專業分工又唔係幾掂,於是開始推「通識教育」,希望大家專得嚟又唔好對其他嘢一竅不通(譬如唔好話凈係識開會但又唔識主持會議咁囉)。

本來呢啲阿媽係女人嘅道理冇咩好講,但係年輕大律師字裏行間流露出嚟嘅「常識」同埋「見識」 真係令瑪莉覺得好得意。首先,瑪莉真係見過好多又識法律又識經濟嘅朋友,一嚟商法雙學位兼修根本係主流之一,二嚟經濟學同法律crossover咗好耐,已經獨立成為一門學問,所以用呢兩個專業嚟做例子,說服力認真麻麻。至於文學呢家嘢喜歡熟悉與否,同你係咩專業真係冇乜關係。依家Bob Dylan攞埋諾貝爾文學獎,熱愛唱K嘅你以後都可以話自己係文學發燒友啦!(利申:瑪莉對唱K同Dylan BB兩個都咁心心眼

另一個(苦)笑點就係年輕大律師將「娛樂」形容為佢涉獵嘅「範疇」之一。大家都知從事娛樂演藝行業好鬼辛酸,付出幾多努力都未必成功,依家年輕大律師一句同「香港女孩傳緋聞,被扯進了娛樂版」,就話自己「涉獵」咗呢個「範疇」,瑪莉真係戥嗰啲日捱夜捱嘅藝人唔抵呀!

老老竇竇,年輕大律師講嘅唔係啲咩大道理,如果唔係佢咁鍾意有意無意之間抬高自己身價,瑪莉覺得單眼皮嘅佢都有少少cutie嘅。好嘞,乖喇,聽瑪莉姐姐喺呢度奉勸一句:熱衷本土唔可怕,自吹自擂抬高自己嘅醜態先至係可怕又荒誕。唔信?你睇吓塵暈道長?

匯思瑪莉 @ 法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2016年10月15日《蘋果日報