遊艇上,海風吹起我嘅頭髮,藍天碧海,champagne喺太陽照射下閃閃發光……我真係好想大叫一句:媽呀!同大台啲律師劇一模一樣呀!其實是咁的,上個禮拜,咁啱公司隻遊艇無人book(梗係公司船啦,唔係你哋以為個個律師都揸遊艇咩),我就約咗幾個姊妹出海啦。

「啊!我終於可以抖吓啦!」Mavis突然喺我隔離大叫一聲,嚇我一跳。「妳好大壓力咩?」「前幾日俾老闆捉咗去個乜工商界event,嗰晩簡直係我人生中最痛苦嘅dinner!」「做咩呀,妳係咪遇到色狼?」Trish伸咗隻耳仔過嚟。「Ew!我想嘔呀。」Mavis雙眼翻白。「妳哋知我老細係乜乜政協㗎啦,嗰晚佢話帶我去識吓人喎。雖然我唔太想去,但係都當食餐免費飯啦。點知我嗰枱班uncle咁惡頂。有個係咁話自己有份去嗰啲國慶酒會,見到幾多中聯辦高官。另一個仲要即刻攞部手機出嚟,show佢同689,呀唔係,係「梁~振~英~特~首」嘅合照。真係巧威威呀!」「乜689唔係連建制派都憎佢㗎咩?」Trish問。

「而家個社會就係咁畸形,總係有一班人,鍾意攀附權力嘅核心,好似痴埋去就有著數咁。唔好同佢哋講個權力公唔公義,呢啲佢哋唔care架,佢哋只想覺得自己係屬於特權階級,等佢哋可以自我感覺良好。呢啲人通常自己都無乜料,只係一味盲從附和。一講民主,就話佔中搞到香港好亂、拉布搞到年年內耗,香港經濟發展已經落後其他城市好多呀咁,頂,高鐵、三跑、港珠澳加埋燒咗千幾億,呢啲工程不斷超支,市民被逼供個無底深潭,如果佢哋真係關心經濟又唔見佢哋出聲反對?」

「香港已經越來越似大陸咁無法無天,做一個講事實嘅立法會議員就比人話不智,仲要受死亡威脅,政府又可以明目張膽同鄉紳做枱底交易,究竟係邊個搞到香港咁亂?睇到烏坎鎮壓嘅新聞,就知道喺強權下,國家有幾「尊重」民意,人權同自由係幾咁難守護。兩年前,警察喺佔中出催淚彈;而家香港漸漸朝大陸方向發展,為求目的不擇手段,難保警察幾時出真子彈。但係香港呢班權力嘅膜拜者,佢哋仲有心情慶祝國慶囉!一個吸血嘅政權,有咩值得慶祝呀x你xx冚家x!」

Mavis講完,大家靜咗。「Sorry,我係咪嚇親妳哋?」「無問題呀,呢排興爆粗嘛,妳唔好第日話自己少不更事就得啦。」我話。

Sugar Square @ 法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2016年10月1日《蘋果日報