Nessie Woo @ 法政匯思

平時大家無聊睇下八卦雜誌,間唔中都會見到啲關於某某過氣明星或前模特兒轉行讀law的新聞。其實佢哋轉型嘅過程係點樣架呢?轉行之後嘅生活係唔係好似雜誌所講咁成功呢?等我同大家八吓啦!

如果要轉行讀law,一般來講,如果冇學位嘅,就先要讀返個法律學位(LLB)啦。本身已經有學位嘅可以讀Juris Doctor(JD,亦即法律博士。大家留意番,法律博士並不是一個博士研究學位,而是一個提供給本身有學士學位的人士的法律學位課程),或者倫敦大學法律系校外課程。

有啲前明星喺讀緊law時,都會好似其他同學仔一樣,喺律師樓或者大律師樓搵啲暑期見習工做吓。我好幾年前就曾經同一個前演員喺一間大律師樓一齊做過做暑期工。當時我嘅感覺係大律師樓裏面嘅大部份大律師,都因為嗰位姐姐曾經做過演員,而對佢有少少偏見,不甚友善。

除此之外,我亦曾經目擊過另外一位前演員喺一間律師樓做暑期見習,跟住一大班律師同大律師上法庭。唔好以為啲律師平時行去高等法院好似電視劇咁一字排開好有型咁行,現實生活中,佢哋多數係要攞住好多文件的。我就見到嗰個前演員作為律師團隊中資歷最淺嘅一個,要一個人攞住四五個好重嘅文件夾,好似好辛苦,仲要低聲下氣,而其他律師同大律師就冇乜嘢拎。我諗呢啲(同電視劇《壹號皇庭》完全唔似嘅)生活,同佢之前喺霓虹燈下五光十色嘅拍戲日子,應該好有出入。

有啲完成咗PCLL並成功轉型為律師或大律師嘅前明星或前模特兒工作時,成日都會吸引到同事或者客戶嘅好奇目光。其實我都搞唔清楚個啲人係真心想同佢做朋友,定係出於八卦心理同佢接觸。不過無可否認,律師樓老闆好多時帶啲下屬出去同客戶應酬嘅時候,都會預埋呢啲前明星或者前模特兒一份,因為佢哋就算唔打得都睇得。

呢啲前明星或前模特兒仲會因為佢哋外表比較出眾,而喺律師樓裏面得到唔少着數。例如有啲男同事會周不時放啲小食喺佢哋枱面,又會借啲意走過嚟同佢哋吹水。總之真係呢啲機會是不屬於我的。不過,成日有人會先入為主,認為啲前明星或前模特兒轉行係為咗釣金龜,講真,做律師並唔係識有錢人嘅最佳方法。

仲有,由於有啲人始終都會認為做得演員或模特兒嘅,係讀書方面都未必好似一般人咁出色,所以如果啲前明星或前模特兒喺律師樓工作上表現不如理想,其他人會覺得係證明咗自己之前嘅推斷係正確。但如果嗰啲前明星或前模特兒工作上盡咗力,表現好過預期,其他人又會覺得係應份。所以我有時都會戥佢哋慘。

最後我想講,其實啲八卦雜誌講啲嘢真係「信佢一成,雙目失明」。雜誌內容勁誇張,講到表面風光,但多數都係背後坎坷。例如通常啲雜誌話某某過氣明星俾老細睇得起,做咗幾個月就人工三級跳。要律師樓老闆加人工?邊有咁容易呀!

(圖片來源:《壹號皇庭》劇照)

所有博客及專欄文章只代表作者本人意見,並不代表本報立場。

(原文載於 2016 年 9 月 16 日《852郵報》)