今個禮拜律師界中最鬧哄哄的 gossip,梗係新出爐嘅「業界三寶」……

星期一晚立法會選舉結果出咗之後,立即 call 齊富三代 Ethan、大律師 Clara 和事務律師 Eunice 出來吹下水,為今次立法會選舉 “E-Meet” (即是當年港大 OCamp 後一定要開的檢討會議, Evaluation Meeting)。我覺得唔 E-Meet 的話,當晚一定睡不了……因為今次選舉實在太驚險了。

Ethan 一向都係花生友,但今屆竟然去左做票站監督,花了二十四小時在票站幫手。在觀塘返工嘅佢氣沖沖咁去到 Pacific Place 新餐廳一坐低就話,「好彩你哋班泛民咁多人出來投票咋,我一路見啲公公婆婆來投票,港島喎,手裏面都好明顯見到啲掌心雷,真係好心寒。」 Clara 、Eunice 同我都異口同聲嘖嘖稱奇,我們以為網上流傳某啲票站係咁,原來真係好普遍,連港島都係。

不用講到那麼遠,老老豆豆,我同 Ethan 解釋,法律界今次選舉真係威盡啦,新西、新東、超區三寶,簡直法律界的典範。Clara 同我唔係大律師界最靚女,自問唔差不過同桂綸鎂又真係冇得比。我對 Eunice 笑說,「人又 Eunice 你又 Eunice,點解你冇契爺照住,仲要在律師樓做牛做馬,訴訟又關你事、收購合併又話冇你唔得?」

Happy hour 買一送一,Eunice 點了第二杯 Pinot Grigio 面紅紅咁話,「我都好懷疑我嘅個人能力,個人魅力又唔夠,唯有勤力搭救啦。」Clara 反一反眼說,give me a break。你學下新西律師啦,難道靠個人魅力?一定係,你懂的。

回看今次選舉,泛民主派真係「有驚有險」。我哋幾個花生友律師(唔計路過的富三代 Ethan 啦) E-Meet 打邊爐的想法係,明顯今屆唔少選民都非常重視自己的一票,無論關不關雷動與否,大家都似乎學會和附近的新朋戚友討論投邊一位候選人、如何配票,其實看來已是一個選舉新景象。民間配票當然有風險,幸好選民眼睛雪亮,非建制派奪得過半數直選議席,起碼保住分組點票否決權。但是議會未來四年如何走下去,真是未知之數。Clara 認為只能繼續拉布、繼續守。Ethan 則認為未來的政治氣候會和下屆特首人選很有關係:如果繼續 689,社會激進諗法一定會繼續增加。如果其他候選人,又可能係笑裏藏刀… 不過左膠的我們認為,無論條路幾難行,香港都要堅持。

正當大家都若有所思時,Eunice 突然突破盲腸,認為下屆選應該由 Clara 或我去挑戰律師三寶,問鼎議席,挽回法律界的面子。

Well,「鼎」,我做大律師做得好好地,星期一下晝六點已經可以 happy hour,點解無啦啦要我沾手啲大家認為污糟嘅政治?哼,家陣我啲 case 唔夠咩?

之不過諗左一陣,我回答說,為了香港呢一個家,香港人一定要各司其職。好,下屆我豁出去拋頭露面選下都好喎!最重要的是,大家如果知道私煙 BB 的 P 圖團隊是誰,一定要話我知。

Anyway,各司其職的香港人,共勉之。

而熙@法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2016年9月10日《蘋果日報