「Hey,youfree?Urgent」,電話出現Kelly嘅WhatsApp訊息。雖然已經差不多半夜,但Kelly係我好朋友,又講到明urgent,我當然立即覆message。「Sorry呀,是咁的,妳公司係咪有個EddieTang呀?我想問妳覺得佢個人點呀……」ET?我識,不過呢條問題有可疑,難道妳同佢……「唔係我呀!我幫我家姐問咋……」Kelly聽起來有點氣急敗壞。「佢啱啱同我講,聽日約咗嗰個Eddie食飯呀。妳知啦,佢唔細㗎啦,我費事佢又遇人不淑,所以先諗住做吓DD先,唉……」聽到個「又」字,我忽然想起上次Kelly喊住同我講,佢家姐以前個大狀男朋友偷食……不幸地,法律界打住律師、大狀旗號招搖撞騙,甚至隱瞞自己有老婆仔女周圍識女仔嘅人大有人在。唉,呢位細妹嘅苦心,我明嘅。

Kelly口中嘅DD,即係duediligence,中文係「盡職調查」。例如律師做一單企業收購時,就會幫客人做DD,審查同核對一吓對家公司提供嘅資料。另一個更加普遍嘅情況,就係當律師接一個新client嘅時候,都會進行一個叫做KYC(KnowYourClient)嘅步驟,向客戶索取身分證明文件或者公司成立文件等等,作為核實客戶身分用途。如果單deal特別大,又或者有特殊情況,例如對客戶嘅背景同資金來源有懷疑,律師都有責任去做足調查。呢啲唔係我吹水呀,而係香港律師會出嘅PracticeDirectionP清楚列明嘅,主要係防止律師成為洗黑錢嘅途徑或恐怖活動嘅資金來源,而所有律師行都要遵守㗎。

其實,點只揀男朋友時先要做DD呢?作為市民,我哋點樣揀代表自己嘅人,比終身大事更緊要。揀錯咗,後果係要成個社會一齊去承受,甚至禍延下一代。咁緊要嘅選擇,當然更加需要做好KYC(KnowYourCandidate)啦!除咗平時要多啲關心社會發生嘅事之外,對於每位候選人嘅trackrecord同背景,都應該要有一定嘅了解,千祈唔好人講你就信。須知道,而家政治裡面真係無恥無下限㗎,例如某黨成日以關注民生自居,但又反對立法會用特權法調查鉛水事件,某黨員仲話要「死人冧樓」先可以係暑假開特別大會(即係飲死你先好開會啦);又例如某某黨話爭取男士侍產假,又唔投票支持男士7天侍產假議案,真係「講大話唔眨眼」嘅表表者。今年立法會選舉在即,如果仲未做好功課,記得至少去 http://www.legco.gov.hk 睇吓個投票記錄啦!

SugarSquare@法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2016年7月23日《蘋果日報