自從上幾星期寫咗篇文提及女仔做律師可能三年係八婆,五年係死八婆,八年係死臭八婆之後,收到一不少朋友嘅回覆,話:「Jolie,你有冇搞錯?自己倒自己米,邊有人自己話自己係八婆!?而且,我哋咁靚,又咁可愛,有乜嘢可能係八婆?!」唔……聽完之後,我唯有話:「哎呀,『靚』唔等於唔麻煩,更況且我呢句說話只不過講出某些人對女律師嘅諗法。至於『靚』好難有個客觀標準喎!」由於朋友講起「靚」,今個星期就等我分享一下對「靚」嘅睇法啦!

我覺得「靚」唔係等於著靚衫,靚鞋,用靚袋。中環咁多女仔返工,嗰期興啲乜嘢好多時好多人都用同樣嘅嘢。人人都一樣,實在好悶。好老土咁講,「靚」要由內心開始,有啲人外表好似OK,但心地唔好,我一啲都唔覺得佢靚。仲有,請唔該唔好成日自覺好靚,咁樣實在令人很累。近年啲電視節目很流行搵新聞女主播做旅遊節目,唔知係唔係覺得佢哋叫座力高啲。最近睇咗viutv嘅「歐遊全細界」。呢個節目係介紹歐洲小國,例如夾喺法國和西班牙的安道爾(Andorra)、在瑞士和奧地利中間的列支敦士登(Liechtenstein)、摩納哥(Monaco)等等。節目主持包括無綫前主播蔡雪瑩。唔知係咪預備講稿的同事資料蒐集不足,定冇乜budget,冇人寫講稿,個節目唔夠多地方介紹有關國家嘅風土人情和歷史。最多嘅對白係男主持成日讚女主持靚,又話當地人友善係因為女主持靚。你集集都咁講,實在令人覺得好煩,靚都變唔靚。個節目又表達唔到佢哋對個國家有啲乜嘢認識,有啲失望。

我早幾年去咗瑞士日內瓦旅行,去咗參觀聯合國喺當地嘅總部。個總部對住個湖,有好多樹,十分漂亮。去到嘅時候發現當日有個特別會議,標題係點樣改善某些第三國家嘅婦女權益,例如點樣令更加多婦女獲得受教育嘅機會。當然,參與嘅人士多數為女性,而佢哋亦來自不同種族。我覺得佢哋都好「靚」,因為佢哋都為世界上冇咁幸運嘅人作出努力,希望一啲佢哋唔認識嘅人可以生活得更好。

我唔知道,係唔係因為職業關係,個人好鍾意啲嘢consistent(有一致性),覺得如果自己接受唔到某件事,認為有問題,我唔會覺得如果件事係發生係人哋身上,就變得可接受。好似咁,如果我有一個對我好好嘅老公,我會更希望身邊單身嘅朋友好快可以搵到另一半。因為我感受到兩個人的快樂,我唔可能對其他人用另一個準則。我唔會因為自己已達到所追求嘅事,就覺得唔關自己事。追求嘅嘢有好多,不單是伴侶,可以係更重要嘅事,例如一個自由嘅社會、喺社會上受到公平對待嘅機會等等。「靚」係要有compassion,對世界上其他遇上困難或唔如意事嘅人有同情心及給予幫助。

今個星期,歌手何韻詩遭某國際大品牌取消音樂會,原因可能係何韻詩曾經支持雨傘運動。其實佢原本事業發展得好好,又受歡迎,支持雨傘運動後失去很多工作機會和金錢。我估計她是覺得在某些問題上不能退縮,有些人的權益不被保障,她才決定站出來。無論你是否同意佢嘅政治立場,你不得不承認好少歌手會願意放棄咁多嘢去表態。我覺得佢都有我認為係「靚」嘅特質,就係願意企出嚟,為自己覺得啱嘅事堅持。

你可能覺得,講咁耐都係講性格,唔係講外表。係架,我哋而家講成個package,冇性格點可以叫做「靚」?

Jolie@法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2016年12月31日《蘋果日報