X同我講,兩期前嘅《法政匯絲》爆咗我年年轉工,啲律師樓越轉越細,驚搞到有人以為中小型啲律師樓唔掂,話好唔公平、戥我好嬲豬喎!其實我又點會咁方丈吖。雖然我同阿X唔係好熟,亦唔明白點解佢會覺得我咁方丈,但既然佢一番好意保護我個(佢想像出嚟嘅)玻璃心,等我都係咁意幫中小型律師樓「平反」吓先。

其實香港48%嘅律師樓都係獨資經營嘅(即係得一個腦細),42%嘅律師樓只有兩至五個合夥人,而擁有多過六個合夥人嘅律師樓只佔全部律師樓嘅10%左右。

好多人以為做大型律師樓好風光,但其實做中小型律師樓都有過人嘅地方。例如我做嘢嘅律師樓啦,裏面有一個獨資經營律師同埋兩個律師(包括我),所以好多嘢我都一腳踢,包括幫公司上市搞買賣樓宇按揭離婚遺產商業訴訟傷亡訴訟,我全部都識,仲要係成單案由頭到尾都係我自己做。我啲朋友喺大型律師樓做,就冇呢啲經歷啦。

仲有,好多跨國律師樓喺接新客嘅時候,都要同全球嘅分行check吓,有冇同現有嘅客戶有利益衝突(conflict check),好多時都會因為其他分行嘅客,同香港分行想接嘅新客有衝突問題,而唔可以接新客,但係中小型律師樓就好少有呢個問題。我哋仲會因為咁樣,而接到好多新客,唔少仲係城中隱形富豪添!上星期我間律師樓又接到一個靚仔富豪大客,話唔定我好快就會釣到金龜。嘻嘻!

其實好多中小型律師樓都臥虎藏龍,我聽腦細講,上個月有間美國律師樓(假設稱為「Wall Street Firm」)想打入亞洲市場,而第一步就係要喺香港搵一間本地律師樓聯營。由於我腦細喺呢行其實都薄有名氣(佢攞咗牌六、七年就做咗間小型律師樓嘅合夥人,呢啲喺大型律師樓好少見),所以Wall Street Firm就睇中咗我哋律師樓(假設稱為「Banana & Co」)。咁根據香港法例呢,Wall Street  Firm先要喺香港註冊成為「外地律師行」,再同Banana & Co註冊成為聯營組織。呢兩間律師樓會訂立協議,證明佢哋會分享費用、利潤同僱員等等,而聯營組織嘅名會變成「Banana & Coinassociation with Wall Street Firm」。簡單嚟講,呢個聯營組織要喺香港執業三年,Wall Street Firm先至可以用「Wall Street Firm」個名轉型為「香港律師行」,提供香港法律嘅服務。我就唔知腦細會唔會接受啦,總之我唔想佢哋聯營成功,因為聽講美國啲律師樓工時好長。

最後,不得不提嘅係小型律師樓因為人數少,所以員工之間嘅關係都好好。我哋就好似劇集《愛·回家》裏面,馬壯同其他員工咁樣一家人咁親密,亦冇乜辦公室政治(除非係樓下史林廖賴啲成員加入)。

講到呢度我都好想唱番句:

在世間 遮風擋雨 有一種愛
從六歲到八十也不更改
任我飛天空海闊前望將來
寒或暖 有笑容可一可再

(跳起yeah)

Brenda Banana@法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2016年5月28日《蘋果日報