早前大家喺核心內圍同外圍欣賞黎天王久違嘅歌聲同金句好興奮,除咗因為雷頌德作嘅曲好聽,又可以懷緬吓90年代嘅好時光外,相信巴打絲打都應該係堅·欣賞黎明勇於承擔責任的態度和男人氣概吧!

演唱會過後,正當大家都以為曲終人散嘅時候,突然彈出一個廣告,令全城瘋狂like。大家可能太耐未睇過好廣告,雖然今次無阿May,但隻貨品都立即賣斷市,都咪話唔勁!

除咗一眾打工仔之外,有班人都可能會想唱「腦細你係咪唔爽,我有說話未曾講」,就係689、鬍鬚曾同埋泛民議員喇。據唔同媒體報導,佢哋都有同今個星期火紅嘅委員長張德江會面,不過實際上講咗咩同得到咩反應就係一個謎。

講起委員長的到訪,唔知點解政府如臨大敵,周圍都封路放鐵馬水馬動用數千警力,其實有幾多香港人在乎呢?(吖話時話,點解當年鬧佔中擾民損害香港經濟嘅人唔見晒影嘅呢?)Any肥,出動到反恐程度嘅保安,但最蝦碌莫過於放人喺獅子山頂紮營餵蚊,結果畀人喺山腰掛咗直幡。其實我有啲懷疑,如果唔係有人落錯鞋油,啲人根本就唔會諗起掛直幡,所以鞋唔可以亂擦,會出事㗎!而且水馬同鐵馬係阻擋唔到299個沙士冤魂㗎噃,唔知委員長有無學習大大訪英咁要求風水擺設呢?唉,假如呢位前廣東省委書記、當今中共第三號人物能坦承當年防疫把關不力,又肯真心道歉,那麼他訪港即使封路擾民三天,相信大家條氣都會順啲嘅。

其實擦鞋,又豈係政治中人嘅專利呢?其實做律師,都好多時要帶住矛盾去做人架。好似律師會一年一度投票選理事會(Council)成員嘅時間又到,以往多年都無甚競爭性嘅選舉,今年忽然變得戰況激烈。

今屆理事會選舉,共有9名律師競逐6個理事席位,當中有男有女,有現任理事競逐連任,但首次參選的亦不乏年輕和資深的業內人士。亦有候選人過去曾就社會事件(例如佔領運動)高調發聲,使本屆的理事會選舉添上了政治色彩,瀰漫著一股「火藥」味道。

或許過去2年,律師會時不時出嘅聲明,都有部份會員覺得唔能夠代表佢哋嘅心聲,所以今年好似多咗人出嚟選。我諗佢哋應該係希望為律師會帶來不同聲音,我覺得都係件好事呀。

本來大家都唔太關心呢個選舉,但係由於好多律師行同內務律師(in-house)老細都出盡力想攞下屬嘅proxy(授權票),反而令唔少本來唔記得投票嘅人醒起要投票。甚至原本政治冷感嘅同事亦忽然關心候選人起嚟,周圍打聽各人嘅背景同取態。

無論你哋打算投邊位都好,各位事務律師巴絲,珍惜你的一票,如果5月26日去唔到投票,記得要將填好嘅選票(在5月23日前)又或者將授權票(在5月24日前)郵寄或親身送至指定地址呀!

BelleWoods@法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2016年5月21日《蘋果日報