唔知點解,睇完《跟住矛盾去旅行》葉蘊儀和連詩雅嗰集,好想同大家分享揀男朋友嘅道理。

節目中,連詩雅被批評為ABC港女tone,「懶」係講英文,去佛羅倫斯睇名牌、行街,多過睇博物館,感受當地文化。需知道眾多名畫在Uffizi,佢竟然過門而不入,好似冇去過佛羅倫斯咁。相反,葉蘊儀就好想感受當地藝術氣息,去睇人工製小提琴和參觀當地服飾博物館。各位姊妹們又會唔會想揀個有ABC腔嘅男朋友,去玩只會開Moëtet Chandon和Dom Pérignon,但淨係識個牌子,完全唔知香檳區喺邊,或對法國人如何認真對待這門傳統工藝「零興趣」嘅人拍拖?

記得以前還在唸法律的時候,有位女性前輩同我講:「Jolie,你知道嗎,女仔做律師3年會變『八婆』,5年係『死八婆』,8年就變『死臭八婆』。」我到而家都記憶猶新。現在想起來,我都會明白點解女律師會變「八婆」。做律師工作要小心,往往講求100%正確。事事要仔細,完美。每樣嘢都要想清楚才講,唔講冇根據嘅事。做咗幾年,個人會越來越腌尖,不喜歡人唔用腦或吹水。咁嘅性格,實在好難搵男朋友。以前細個啲,又會想男朋友和自己一樣,喺差唔多嘅學校讀書,興趣「鬼佬」啲,外表運動型啲。後來發覺呢啲咁嘅嘢,根本唔係咁重要,最重要反而係大家價值觀一唔一樣。

我有個女性律師朋友,佢以前個律師男朋友係同自己讀差唔多嘅學校,差唔多嘅興趣,但佢怕事啲,唔會為啱嘅嘢堅持。係,佢係英文好啲,識同外國人溝通多啲,但我朋友實在無辦法再同佢一齊落去。

後來個朋友識咗一個同佢好唔同,冇咁鬼佬嘅男朋友。佢起初都擔心大家唔夾。女方放假鍾意去博物館睇畫,男方鍾意睇樓。女方喜歡英國,男方喜歡去泰國做spa。女方好怕啲男仔得個樣,問落乜都唔識。原來呢個男仔好叻歷史,所以佢哋一放假就去睇歷史文物。時間耐咗,男變得喜歡睇畫,女嘅亦唔介意睇樓。佢哋都對事情執着,覺得啱嘅是不輕易放棄。我呢對朋友已經結咗婚7年啦!

所以呢,男朋友有冇ABC腔,識唔識「生活品味」真係唔係咁重要!最緊要係價值觀同唔同!

我有個表妹,都是唸法律,原本有個幾好嘅男朋友,佢後來識咗個好識講嘢,話屋企可以畀首期買樓嘅男仔。表妹覺得呢個人識講嘢,又好似好有「計劃」,又帶佢去唔同地方玩,好似有趣啲,所以就飛咗原來個男朋友。拍咗年幾,個男嘅又識咗第二個,和女方分開。當然,佢梗係同人講佢屋企有錢俾首期……我一早同表妹講,呢個人可能吹水之嘛,你點知佢真係咁有「計劃」?!

大台小花之前畀人影到同新律師男友拍拖。㯫聞男方屋企有錢,揸名車返工云云……唉,架名車係佢屋企,又唔係佢嘅,如果只是因為個「package」好而一齊,我就覺得冇咩意思。如果有啲好似梁特咁鍾意迴避問題,帶你遊花園,我估你每日只會想鬧爆佢!

讀法律嘅,最應該知道「it is the substance, not form, which counts.」我Jolie最鼓勵大家做多啲duediligence,搵最啱嗰個!

Jolie@法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2016年4月30日《蘋果日報