放完復活節長假,我個女終於返學啦,我本來以為佢會好掛住同學仔同老師啦,點知佢放學喊住口返屋企。佢話選唔到做茶點區區長,佢好失望喎!我問佢點選㗎,佢話老師提名,跟住邀請同學和議,之後大家係班上舉手投票,多個半數就可以通過。我聽到覺得好合理好公道。仲諗住安慰個女之時,佢話其實本來得前面幾位同學舉手,但後排同學見狀,都慢慢舉手,搞到佢都舉埋手支持另一位同學當選。哦,我明白啦,羊群效應,等我下次向老師反映一下,用secretballot(不記名投票)咪得囉!

不過話時話,豈止佢4歲人仔喺呢種公開投票場合感受到壓力。我做上市IPO項目,一大堆專業人士(投資銀行Banker、律師、會計師、市場硏究專家、估值師等等……)有時大家投票作決定都充滿矛盾同壓力。

是咁的,我們在盡職調查嘅過程當中,要對上市申請人作出地毯式調查(包括種種尖酸刻薄嘅提問),以確保上市申請人,提供嘅資料真確無誤。就係咁,我作為律師,日日帶著矛盾去開工:上市申請人既係客戶又係金主,養活我哋呢班專業人士,但係我哋又要有專業操守喎,有啲問題想問又唔敢開口問。例如有啲上市申請人嘅背後金主究竟是邊個呢,佢之前有冇犯罪或違規紀錄呢?有次我問起各股東同公司主席嘅關係,有個美女股東個樣「生得」同范爺一模一樣,佢答我:「我係梁主席……嘅好好朋友」。我心諗:哦!即係小三啦!主席聽到「好好朋友」嘅回答嬲到震,要求換走發問呢條問題嘅律師(即係我)。嗰一刻我覺得自己被「老屈安裕」,欲哭無淚。

呢種要喺你米飯班主頭上動土嘅情況,各位專業人士一般會先投票,研究呢類問題有冇需要問,之後再研究啲問題點樣問。如果叫我喺咁嘅情況下,公開舉手投票堅持公審自己米飯班主,又真係有好大壓力嘅。所以,Banker一般會靜靜雞各自通知律師佢哋嘅盡職調查嘅要求,等律師去做說客(即係叫我死去做醜人)。所以我見證了無數專業人士在客人面前討論、投票時,話事事OK,收線半秒後私底下打電話比我話事有蹺蹊,叫我跟進。

講到投票,令我諗起香港電影金像獎嘅滿城風雨,從未見過有咁多人出盡力度公開批評、甚至侮辱當選嘅最佳電影,這些人都只不過係見到更大嘅利益,怕影響背後條水喉,而表個態,割下席。我們一些尊貴的議員又何嘗不是為了盲目護航,醜態盡露。特首千金嘅一件行李,讓我們見盡歪理。

如果你同我一樣,心裡面憤慨、但又有少少無奈,又或者想爆粗鬧呢班雙面人嘅話,最有效方法係9月立法會投票Vote Them Out!記住5月2日前要登記或者更新選民登記資料!

網址: http://bit.ly/1HaqRlg
查詢電話:28911001

為時未晚!香港人加油!

法網思人@法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

 

原文載於2016年4月23日《蘋果日報